នាយកដ្ឋានប្រឆាំងបទល្មើសបច្ចេកវិទ្យា បញ្ជូនបុរសម្នាក់ទៅតុលាការករណីឆបោកតាម Facebook

ភ្នំពេញ៖ នៅ​ថ្ងៃទី១៥ ខែសីហា ឆ្នាំ២០១៩ នេះ នាយកដ្ឋាន​ប្រឆាំង​បទល្មើស​បច្ចេកវិទ្យា បាន​បញ្ជូន​ជនសង្ស័យ​ម្នាក់ ឈ្មោះ​នួន វ៉ា ភេទ​ប្រុស អាយុ ៣២ ឆ្នាំ ទៅ​តុលាការ ករណី​បង្កើត​គណនី​ហ្វេ​ស​ប៊ុ​ក​ក្លែងក្លាយ ដើម្បី​ទៅ​បោកប្រាស់​អ្នកដទៃ។

ជនសង្ស័យ ឈ្មោះ​នួន វ៉ា ត្រូវបាន​នាយកដ្ឋាន​ប្រឆាំង​បទល្មើស​បច្ចេកវិទ្យា សហការ​ជាមួយ​អធិការដ្ឋាន​នគរបាល​ខណ្ឌ​សែន​សុខ ឃាត់ខ្លួន​ត្រង់ចំណុច​ផ្លូវ​ឌួង​ងៀប ៣ សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ។ ជនសង្ស័យ រូបនេះ បានធ្វើ​សកម្មភាព ដោយបាន​យក​រូបថត និង​ឈ្មោះ​ថ្នាក់ដឹកនាំ​ជាន់ខ្ពស់ និង​លោក​មេធាវី ប៊ុន ហ៊ួ​ន ដែលជា​មេធាវី ស្ម័គ្រចិត្ត សម្តេច​តេ​ជោ ទៅ​បង្កើត​គណនី​ហ្វេ​ស​ប៊ុ​ក​ក្លែង (Fake Account) ដើម្បី​ធ្វើការ​ឆបោក និង​ជំរិត​ទារប្រាក់។

ក្រោយពី​ការឃាត់ខ្លួន​ និង​សាកសួរ​បំភ្លឺ ជនសង្ស័យ​បាន​សារភាព​នូវ​កំហុស​ដែល​ខ្លួន​បាន​ប្រព្រឹត្ត​នាពេល​កន្លងមក ។

ឯកឧត្តម ឧ​ត្ត​ម​សេនីយ៍​ឯក ជា ពៅ ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា បាន​ថ្លែង​ដាស់តឿន និង​ក្រើនរំលឹក​ដល់​ប្រជាពលរដ្ឋ​ទាំងអស់​ដែល​ប្រើប្រាស់​ប្រព័ន្ធ​បណ្តាញ​សង្គម​ជាពិសេស​បណ្តាញ​សង្គម​ហ្វេ​ស​ប៊ុ​ក ឲ្យ​មានការ​ប្រុងប្រយ័ត្ន​ក្នុងការ​ទំនាក់ទំនង សន្ទនា​ជាមួយ​អ្នកដទៃ ឬ​មិត្តភក្តិ មុននឹង​ផ្តល់ព័ត៌មាន​ផ្ទាល់ខ្លួន ទៅ​នរណាម្នាក់​ត្រូវ​ពិនិត្យ​ពិចារណា​អោយបាន​ច្បាស់លាស់ ចៀសវាង​ការ​ចាញ់ បោក ការ​លួងលោម មនោសញ្ចេតនា នាំអោយ​បាត់បង់​កិត្តិយស សេចក្តីថ្លៃថ្នូរ​និង​ទ្រព្យសម្បត្តិ​ផ្ទាល់ខ្លួន៕