លោក ផៃស៊ីផាន៖ ការរំលឹកដល់ថ្ងៃ ២៣ តុលា ប្រៀបដូចបើក​ឲ្យបរទេស​មក​គ្រប់គ្រងយើងអីចឹង​

ភ្នំពេញ៖ ក្នុង​សន្នីសិទ​សារព័ត៌មាន​ធ្វើឡើង ដើម្បីបកស្រាយស្ដីពីមូលហេតុដែលរដ្ឋាភិបាលសម្រេចកាត់បន្ថយថ្ងៃឈប់សម្រាកពី 28 ថ្ងៃមកត្រឹម 22 ថ្ងៃ លោក ផៃ ស៊ី​ផាន អ្នក​នាំពាក្យ​រាជរដ្ឋាភិបាលបានលើកឡើងថា​ការ​រំលឹក​ទិវា​កិច្ច​ព្រមព្រៀង​ក្រុង​ប៉ារីស ២៣ តុលា​ប្រៀបបាន​នឹងការបើកចំឲ្យ​​បរទេស​មក​គ្រប់គ្រងកម្ពុជា​ដូច្នោះដែរ។

លោក ផៃ ស៊ីផាន ថ្លែង​ថា​អង្គការ​មួយ​ចំនួន​នៅ​កម្ពុជា​តែងតែ​ប្រើ​ប្រាស់​ទិវា​នេះ ដើម្បី​ហៅ​បរទេស​ឲ្យមក​គ្រប់គ្រង​កម្ពុជា​ ខណៈ​លោក​បញ្ជាក់​ថា​កិច្ចព្រមព្រៀង​នេះ គឺ​គ្រាន់​តែ​ជា​សុបិន្ត​អាក្រក់​មួយប៉ុណ្ណោះ​​ ដោយ​​ជំរុញ​ឲ្យប្រជាជន​​ឲ្យតម្លៃ​ដល់​រដ្ឋធម្មនុញ្ញ​របស់​កម្ពុជា​វិញ។

លោក​ផៃ ស៊ីផាន៖ « បើ​យើង​រំលឹក​កិច្ច​ព្រមព្រៀង​ក្រុងប៉ារីស​បានន័យ​ថា​យើង​បើក​ចំហ​ឱ្យ​បរទេស​មក​គ្រប់គ្រង​យើង​ផ្ទាល់! ក៏​ប៉ុន្តែ​ប្រសិន​យើង​រំលឹក​ទិវា​រដ្ឋធម្មនុញ្ញ​របស់​កម្ពុជា​ យើង​អាច​ជជែក​គ្នា​បាន តើ​ធ្វើ​យ៉ាង​មិច​ឱ្យ​ប្រទេស​យើង​ជឿន​លឿន​តទៅទៀត? រក្សា​ស្ថិរភាព​ឱ្យ​បាន​រឹង​មាំ​តទៅ​ទៀត តើ​យើង​ធ្វើ​ច្បាប់​មួយ​ការ​ពារ​ប្រយោជន៍​របស់​ប្រជាជន​កម្ពុជា​ប្រាស់ចាក​ពី​ការ​ជិះជាន់​ពី​មន្ត្រី​អាក្រក់ » ។ ​

កិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នំា១៩៩១ មានប្រទេសចំនួន ១៨ បានចុះហត្ថលេខាទទួលស្គាល់ ក្នុងនោះ​មាន​ទាំងមហាអំណាចទាំង ៥ផងដែរ ដូចជា ចិន រុស្ស៊ី បារាំង និងសហរដ្ឋអាមេរិក ជាដើម។

សូមបញ្ជាក់ថា៖ ក្នុង​តារាង​ថ្ងៃ​ឈប់សម្រាក​សម្រាប់​ឆ្នាំ២០២០ រាជរដ្ឋាភិបាល​កម្ពុជា កាត់បន្ថយ​ចំនួន ៦ ថ្ងៃ ពី២៨ថ្ងៃ​មក​នៅត្រឹម ២២ ថ្ងៃ។ ​ក្នុងចំណោម​ថ្ងៃ​ដែល​ត្រូវ​កាត់ចេញ​នោះ​មាន​កិច្ចព្រមព្រៀង​ក្រុង​ប៉ារីស ២៣ តុលា និ​ង​ទិវា​សិទ្ធិមនុស្ស​អន្ដរជាតិ ១០ធ្នូ ត្រូវ​កាត់ចេញ។  ក្នុងនោះ ព្រះរាជ​ពិធីបុណ្យ​ចម្រើន ព្រះជន្ម​ព្រះមហាក្សត្រ​ខ្មែរ ព្រះករុណា ព្រះបាទ​សម្តេច ព្រះបរមនាថ នរោត្តម សីហមុនី ត្រូវបាន​កាត់បន្ថយ​ ០២ ​ថ្ងៃ ពោល​ថ្ងៃ​ឈប់សម្រាក​នៅសល់​តែ ០១​ថ្ងៃ។ ដោយឡែក​បុណ្យមាឃបូជា ទិវា​ជាតិ​នៃ​ការចងចាំ ទិវា​កុមារ​អន្តរជាតិ ក៏បាន​ត្រូវ​កាត់ចេញ​ដូចគ្នា៕