បេក្ខជនប្រលងឆ្នាំនេះថយចុះតែ ៣៧នាក់ ហើយគ្មានមន្ត្រី ACU នៅអង្កេតការណ៍ដូចមុនដែរ

ភ្នំពេញ៖ នៅឆ្នាំ២០១៩នេះមានបេក្ខជន-បេក្ខនារីជិត ១២ម៉ឺននាក់ នឹងចូលរួម​ប្រឡងយកសញ្ញាបត្រមធ្យមសិក្សាទុតិយភូមិ (បាក់ឌុប) នៅព្រឹកថ្ងៃចន្ទ ទី១៩ ខែសីហាស្អែកនេះ ខណៈមិនមានវត្តមានមន្ត្រីអង្គភាពប្រឆាំងអំពើពុករលួយ (ACU) ចុះ​ស​ង្កេត​ការណ៍ប្រឡងដូចរាល់ឆ្នាំ ប៉ុន្ដែក្រសួងអះអាងថា ​វិធាន​ការ​លើ​ការ​ប្រឡង​​នឹងបន្តអនុវត្តន៍ដោយតឹងរឹង និង​ម៉ឹង​ម៉ាត់​តាម​គោលការណ៍ «ចេះគឺជាប់»។

ក្រសួងអប់រំ យុវជន និងកីឡា បានឲ្យដឹងថា ការប្រឡងបាក់ឌុបនៅឆ្នាំនេះ មានបេក្ខជនសរុប ១១៧,០២៤នាក់ ស្រី ៦០,៤២១នាក់ ថយចុះ ៣៧នាក់ បើធៀបនឹងឆ្នាំ២០១៨។ ដោយ​ចែកចេញ ២០២មណ្ឌល (ថ្នាក់វិទ្យា​សា​ស្ត្រ ៧៥មណ្ឌល និងថ្នាក់វិទ្យាសាស្ត្រសង្គម ១២៧មណ្ឌល) ស្មើនឹង ៤,៧២៥បន្ទប់។ បេក្ខជន​ប្រឡង​ថ្នាក់​វិទ្យា​សា​ស្ត្រ មានចំនួន ៤៤,៦៨៣នាក់ ស្រី២៥,២៨៥នាក់ (១,៨១០បន្ទប់) ថ្នាក់វិទ្យាសាស្ត្រសង្គម មានចំនួន ៧២,៣៤១នាក់ ស្រី ៣៥,១៣៦នាក់ (២,៩១៥បន្ទប់)។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានថ្លែងថា ​ក្រសួងបានរៀបចំ និងត្រៀម​លក្ខណៈ​សម្ប​ត្តិរួចរាល់អស់ហើយទាំងមន្ត្រីគ្រប់គ្រងការប្រឡង មណ្ឌល និងវិញ្ញាសារ។ ពោលអ្វីៗនឹង​ត្រូវប្រ​ព្រឹត្តទៅ​តាម​ការ​​គ្រោងទុក គ្មានអ្វីប្រែប្រួលនោះឡើយ ប៉ុន្ដែ​មានមណ្ឌលប្រឡងតែមួយប៉ុណ្ណោះនៅក្នុងខេត្តកំពត ត្រូវបានផ្លាស់​ប្តូរ​ដោយ​សារតែជំនន់ទឹកភ្លៀង។

លោក រស់ សុវាចា បានបញ្ជាក់ថា «ការរៀបចំរបស់ក្រសួងអប់រំ យុវជន និងកីឡា សម្រាប់ដំណើរការ​ប្រឡង​មធ្យ​ម​សិក្សាទុតិយភូមិ សម័យប្រឡង១៩-២០ សីហា ឆ្នាំ២០១៩នេះ គឺបានរៀបចំរួចស្រេចទៅតាមការគ្រោងទុក ចំណែកឯហឹបវិញ្ញាសារទាំង៤០៤ ក៏បានដឹកទៅដល់មណ្ឌលប្រឡងរួចរាល់ផងដែរ»។

លោកបន្ថែមថា ដើម្បីធ្វើឲ្យ​ការប្រឡងទទួលបានជោគជ័យតាមគោលដៅដែលបានគ្រោងទុក ក្រសួងបាន​ពង្រា​យ​​មន្ត្រីគ្រប់​គ្រង​ការ​ប្រឡងនេះ សរុប ១៧,៤៣០នាក់ ក្នុងនោះ អប្បមាទ ៦០៦នាក់ ជំនួយការអប្បមាទ ដែល​ជា​គរុនិសិ្សត ២,៤០៥នាក់ អនុរក្ស ១០,៦៣១នាក់ ប្រធានមណ្ឌល២០២ គណៈកម្មការត្រួតពិនិត្យតាមអគារ ១,១៨១នាក់ និងគណៈកម្មការកណ្តាល ២,៤០៥នាក់។

ការប្រឡងនៅថ្ងៃទី១៩ ខែសីហា ស្អែកនេះ សម្រាប់ថ្នាក់វិទ្យាសាស្ត្ររួមមានមុខវិជ្ជា៖ ប្រវត្តិវិទ្យា, ជីវវិទ្យា, គីមីវិទ្យា និង​ភាសាបរទេស។ ថ្នាក់វិទ្យាសាស្ត្រសង្គមរួមមានមុខវិជ្ជា៖ ផែនដី និងបរិស្ថានវិទ្យា, ប្រវត្តិវិទ្យា, ភូមិវិទ្យា និងភា​សា​បរទេស។
ជាមួយគ្នានេះ នៅថ្ងៃទី២០ ខែសីហា សម្រាប់ថ្នាក់វិទ្យាសាស្ត្ររួមមានមុខវិជ្ជា៖ អក្សរសាស្ត្រខ្មែរ, រូបវិទ្យា និង​គណិត​វិទ្យា។ ថ្នាក់វិទ្យាសាស្ត្រសង្គមរួមមានមុខវិជ្ជា៖ គណិតវិទ្យា, សីលធម៌ ពលរដ្ឋវិជ្ជា និងអក្សរសាស្ត្រខ្មែរ៕