សមត្ថកិច្ច​កំពុង​ស្រាវជ្រាវ​រក​ជន​ដែល​បង្ហោះ​ព័ត៌មាន​ឃាតកម្ម​នៅ​ផ្សារ AEON II មក​ដាក់​ទោស

ភ្នំពេញ៖ នៅ​ថ្ងៃទី​ ២៨ ខែសីហា ឆ្នាំ២០១៨នេះ នាយកដ្ឋាន​ប្រឆាំង​បទល្មើស​បច្ចេកវិទ្យា បាន​កំពុង​ស្រាវជ្រាវ​ផេក​អនាមិក​មួយ ដែល​បាន​បង្ហោះ អំពើ​សម្លាប់​មួយ​កើតឡើង​នៅ​ក្រៅ​ប្រទេស​ ដោយ​បាន​សរសេរ​បំផុស​ថា​កើតឡើង​ក្នុង​ផ្សារ​ទំនើប​ AEON II ស្ថិត​ក្នុង​ខណ្ឌ​សែនសុខ ​រាជធានី​ភ្នំពេញ ។

លោក​ឧ​ត្ត​ម​សេនីយ៍​ឯក ជា ពៅ ប្រធាន​នាយកដ្ឋាន​ប្រឆាំង​បទល្មើស​បច្ចេកវិទ្យា បាន​ថ្លែង បដិសេធ​អំពើ​សម្លាប់ កើតឡើង​ក្នុង​ផ្សារ​អ៊ី​អន២ និង​បានដាក់​បទបញ្ជា​ឱ្យ​មន្ត្រីក្រោមឱវាទ​ធ្វើការ​ស្រាវជ្រាវ​ជាបន្ទាន់។ លោក​ថ្លែងថា «ក្នុងនាម​នាយកដ្ឋាន​ជំនាញ​ប្រយុទ្ធប្រឆាំង និង បទល្មើស​បច្ចេកវិទ្យា បន្ទាប់ពី​បាន​ពិនិត្យឃើញផេក មួយ​ដែល​បាន​បង្ហោះ​ថា​មាន​ឃាតកម្ម​ក្នុង ផ្សារ AEON II នៅក្នុង​ខណ្ឌ​សែន​សុខ យើង​បាន​ចុះ​ស្រាវជ្រាវ​និង​សហការ​ជាមួយនិង​សមត្ថកិច្ច​មូលដ្ឋាន។ យើង​បាន​ពិនិត្យឃើញថា​ព័ត៌មាន​នេះ​ជា​ព័ត៌មាន​ក្លែងក្លាយ​ដែល​សរសេរ​នៅក្នុងផេកមួយចំនួន។ នាយកដ្ឋាន​ជំនាញ បាន​ចាត់វិធានការ ស្រាវជ្រាវ​អំពីផេកនេះហើយ។»

លោក​ឧ​ត្ត​ម​សេនីយ៍​ឯក ជា ពៅ បាន​បន្តថា​ព័ត៌មាន​ក្លែងក្លាយ​ដែល​បង្ហោះ​ក្នុងផេកនោះ គឺ​ក្នុង​គោលបំណង បង្កឱ្យមាន​ភាពច្របូកច្របល់ និង​យល់ច្រឡំ​នូវ​កត្តា​សន្តិសុខ​ក្នុង​ទឹកដី​ព្រះរាជាណាចក្រ​កម្ពុជា ក្រោម​ការដឹកនាំ​ដែលមាន​ការរីកចម្រើន​របស់​រាជរដ្ឋាភិបាល​កម្ពុជា ដែលជា​ប្រទេស​មាន​ស្ថេរភាព​ជា​ប្រក្រតី និង​មិន​មានរឿង​អ្វី​កើតឡើង​ដូច​ព័ត៌មាន​មួយចំនួន​ចេះតែ​បាន​និយាយ​មួលបង្កាច់ ការដឹកនាំ​របស់​រដ្ឋា​ភិ​បាល​នោះទេ៕