ភ្នំពេញ៖ បន្ទាប់ក្រសួងធនធានទឹកនិងឧតុនិយម បានប្រកាសថា កម្ពុជា នឹងអាកាសធាតុមិនល្អពេញមួយសប្ដាហ៍ គិតចាប់ពីថ្ងៃទី ០៣ ដល់ទី ០៩ ខែកញ្ញា ដោយបណ្តាខេត្ត-ក្រុងនានា នឹងមានភ្លៀងធ្លាក់ពីមធ្យមទៅច្រើន ពេលនេះមានដំណឹងថ្មីបញ្ជាក់ថា ព្រះរាជាណាចក្រកម្ពុជា នឹងរងឥទ្ធិពលពីបាតុភូតធម្មជាតិចំនួន ០៣ ព្រមៗគ្នា ក្នុងនោះមានឥទ្ធិពលពីប្រព័ន្ធសម្ពាធទាប ដែលបាននិងកំពុងលាតសន្ធឹងអូសកាត់លើប្រទេស ថៃ ឡាវ និងប្រទេសវៀតណាម , ឥទ្ធិពលពីព្យុះទី ១៤ ឈ្មោះ កាហ្ស៊ីគី ( KAJIKI ) និងឥទ្ធិពលពីខ្យល់មូសុងនិរតីខ្លាំង ។
ក្រុមអ្នកព្យាករក្រសួងធនធានទឹក និងឧតុនិយមបានបញ្ជាក់ឲ្យដឹង នៅថ្ងៃទី៣ ខែកញ្ញា ឆ្នាំ ២០១៩ នេះថា បន្ទាប់ពីបានធ្វើការពិនិត្យតាមដាន និងជាប្រចាំលើស្ថានភាពអាកាសធាតុរកឃើញថា ឥទ្ធិពលរបស់បាតុភូតធម្មជាតិទាំង ០៣ ខាងលើ នឹងបង្កឲ្យធាតុអាកាសនៅព្រះរាជាណាចក្រកម្ពុជា ចាប់ពីថ្ងៃទី ០៣ ដល់ថ្ងៃទី ១០ ខែកញ្ញា ឆ្នាំ ២០១៩ មានស្ថានភាពដូចខាងក្រោម៖
- បណ្តាខេត្តនៅតំបន់ទំនាបកណ្តាលភាគពាយ័ព្យ តំបន់ខ្ពង់រាបភាគខាងជើង តំបន់ខ្ពង់រាបភាគឦសាន( ជាប់ព្រំប្រទល់ជាមួយប្រទេសវៀតណាម ) និងតំបន់ជួរភ្នំដងរែក នឹងបន្តមានភ្លៀងធ្លាក់ពីមធ្យមទៅច្រើន ក្នុងនោះ មានផ្នែកខ្លះអាចនឹងមានភ្លៀងធ្លាក់គំហុកខ្លាំង និងអាចបង្កជាជំនន់ទឹកភ្លៀង។
- បណ្តាខេត្តនៅតំបន់ឆ្នេរ ពិសេសខេត្តព្រះសីហនុ និងខេត្តកោះកុង នឹងបន្តមានភ្លៀងធ្លាក់ក្នុងបរិមាណពីបង្គួរ ទៅច្រើន ។ នៅលើលំហសមុទ្រ ផ្ទៃមេឃមានសភាពអាប់អួ មានភ្លៀង និងខ្យល់បក់បោកខ្លាំង រលកសមុទ្រមានកម្ពស់ខ្ពស់ៗ ។
- រាជធានី និងបណ្តាខេត្តមួយចំនួនទៀត មានភ្លៀងធ្លាក់ពីតិចទៅមធ្យម ។
សេចក្តីជូនដំណឹងរបស់ក្រសួងធនធានទឹក និងឧតុនិយមបានបញ្ជាក់បន្ថែមថា ចំពោះស្ថានភាពអាកាសធាតុខាងលើនេះ ក្រុមការងារបាននិងកំពុងបន្តតាមដានលើស្ថានភាពអាកាសធាតុនេះ និងស្ថានភាពទឹកទន្លេជាប់ជាប្រចាំ ហើយនឹងធ្វើការជម្រាបជូនព័ត៌មានជាបន្តបន្ទាប់ទៀត ក្នុងករណីចាំបាច់។ យោងលើស្ថានភាពអាកាសធាតុខាងលើនេះ ក្រុមការងារក្រសួងធនធានទឹក សូមណែនាំនិងអំពាវនាវដល់ក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន ពិសេសបងប្អូនប្រជានេសាទសមុទ្រជាបជាព័ត៌មាន និងសូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
