លោក ហេង ឡុង៖ បើមិនកាត់ទោសលើពលករខ្មែរដែលជេរប្រមាថនោះទេ គឺពិតជាអយត្តិធម៌សម្រាប់ចំប៉ីខ្មៅ

ភ្នំពេញ៖ លោក ហេង ឡុង អ្នកជំនួញ និង​ជា​អ្នកលេង​ហ្វេ​ស​ប៊ុ​ក​ល្បីឈ្មោះ និង​លោក​ឧកញ៉ា ឡេង ណា​វ៉ា​ត់​ត្រា ម្ចាស់​ក្រុមហ៊ុន ឡេង​ណា​វ៉ា​ត់​ត្រា គ្រោង​ដាក់ពាក្យ​បណ្តឹង​ប្ដឹង​ពលករ​ខ្មែរ​ម្នាក់​ដែល​ធ្វើការ​នៅ​ប្រទេស​កូរ៉េ ដោយ​ចោទថា ពលករ​រូបនេះ បាន​លួច​ថត​សកម្មភាព​រាំច្រៀង​របស់​ពួកគេ​នៅ​ព្រលានយន្តហោះ​កូ​ឡា​ឡាំ​ពួ​ដោយ​គ្មាន​ការអនុញ្ញាត និង​ការប្រើ​ពាក្យសំដី​មិន​សមរម្យ​មកលើ​ពួកខ្លួន។

លោក ហេង ឡុង សរសេរ​លើ​បណ្ដាញ​សង្គម​ហ្វេ​ស​ប៊ុ​ក​របស់ខ្លួន​នៅ​ថ្ងៃទី ១៣កញ្ញា​នេះ​បាន​ឲ្យ​ដឹងថា៖«ចំប៉ី​ខ្មៅ ដៀល​ខ្មែរ​ត្រូវ​តុលាការ​កាត់ទោស​ដាក់គុក១ឆ្នាំ។ បើ​ប្អូនប្រុស​នេះ​មិន​ត្រូវបាន​អនុវត្ត​ច្បាប់ មិន​យុត្តិធម៌​សម្រាប់​ចំប៉ី​ខ្មៅ​ទេ។ ច្បាប់ គួរ​រឹតបន្តឹង​ទៅលើ​បុគ្គល​គ្រប់រូប​ដែល​ដៀល​ពូជខ្មែរ និង​ព្រះមហា​ក្ស​ក្យ»។

លោក​បន្តថា៖«ពួកយើង​ជា​ជនរងគ្រោះ បានដាក់​ពាក្យបណ្តឹង ទៅ​ក្រុម​បង្ក​ដែល​បាន​លួច​ថត​វីដេអូ ដោយ​គ្មាន​ការអនុញ្ញាត និង​ជេរប្រមាថ​លើ​សិល្បករ​ខ្មែរ នៅ​ប៉ុស្តិ៍ប៉ូលីស​នៅ​ប្រទេស​កូរ៉េ​រួចរាល់​ហើយ។ ទន្ទឹមគ្នា​នេះដែរ មេធាវី​យើង​ក៏​កំពុង​រៀបចំ​ដាក់ពាក្យ​បណ្តឹង​នៅ​ប្រទេស​ខ្មែរ​ដែរ ដើម្បី​ការពារ​តំលៃ​ខ្មែរ​ទូទៅ​ដែល​ត្រូវបាន​ពួកនេះ​ដៀល​ពូជ»។

ទន្ទឹមនឹង​មានការ​ចម្រូងចម្រាស់​ពាក្យសំដី​នេះ បុរស​ដែល​រង​ការចោទប្រកាន់​នោះបាន​ចេញមុខ​បកស្រាយ​លើ​បណ្ដាញ​ហ្វេ​ស​ប៊ុ​កមួយ​ឈ្មោះ Bun Hoeun Sanh ដោយ​អះអាងថា ខ្លួន​ជា​អ្នក​ថត និង​បង្ហោះ​វីដេអូ​នោះ ហើយ​លោក​បាន​បកស្រាយ​ក្រោយពី​ផ្ទុះ​ការរិះគន់។

ក្នុង​វី​ឌី​អូ​នោះបាន​លើកឡើងថា ក្នុងនាម​ពួកគេ​ជា​បុគ្គល​គំរូ ពោល​គឺជា​តារា​សម្ដែង និង​រាំច្រៀង គួរ​បញ្ចេញ​សកម្មភាព ឬ​ការសម្ដែង​បង្កប់​ក្នុងន័យ​អប់រំ លើកតម្កើង​សី​ល៌​ធម៌ វប្បធម៌ និង​ជា​បុគ្គល​ដែល​ប្រជាពលរដ្ឋ​ទូទៅ​ចាំ​ឃ្លាំមើល និង​យកតម្រាប់​តាម។

លោក​បន្តថា ក្រុម​តារា​សម្ដែង​ទាំងនោះ បាននាំគ្នា​រាំច្រៀង​គ្មាន​ការអៀនខ្មាស់​នៅក្នុង​ព្រលានយន្តហោះ​កូ​ឡា​ឡាំ​ពួ​នៃ​ប្រទេស​ម៉ាឡេស៊ី ប៉ុន្ដែ​ខណៈនោះ​លោក​បាន​ទៅប្រាប់​កុំ​ឲ្យ​មាន​សកម្មភាព​រាំច្រៀង​មិន​សមរម្យ​នៅ​ប្រទេស​ម៉ាឡេស៊ី​បែបនេះ ពួកគេ​បែរជា​ខឹងសម្បារ​រូបគេ​ទៅវិញ។

ការប៉ះទង្គិច​គ្នា​នេះ ខណៈដែល​លោក ឡេង ណា​វ៉ា​ត់​ត្រា ជា​ឧកញ៉ា​វ័យក្មេង​ម្ចាស់​ផលិតកម្ម Galaxy ដែល​កំពុងមាន​ប្រជាប្រិយភាព​លើ​វិស័យ​ជំនួញ បានរៀបចំ​កម្មវិធី​តន្ត្រី​មួយ​នៅ​ប្រទេស​កូរ៉េ ដើម្បី​ឲ្យ​ពលករ​ខ្មែរ​នៅ​ទី​នោះបាន​រាំលេង​សប្បាយ​មុន​ឱកាស​បុណ្យ​ភ្ជុំបិណ្ឌ។

លោក​បាន​ដឹកនាំ​តារា​ប្រុស​ស្រីល្បីៗប្រចាំ​ប្រទេស​កម្ពុជា​ជាច្រើនរូប ក្នុងនោះ​មានដូចជា កំពូល​តារាចម្រៀង​ប្រុស លោក ព្រាប សុវត្ថិ និង​កូនប្រុស​ទាំងបី​នាក់, លោក ខេ​ម, កញ្ញា អ៊ី​វ៉ា, លោក ប៉ែន ចំរុង, ក្រុម​ចចក​សមុទ្រ, លោក គូ​ម៉ា និង​តារាល្បីៗផ្សេង​រូប​ទៀត៕