លោក មាស រិទ្ធី និង​អ្នកសារព័ត៌មាន ១៦រូប​ទៀត ឡើងជាឯកឧត្ដម មានឋានៈ​ស្មើនឹង​អនុរដ្ឋលេខាធិការ

ភ្នំពេញ៖ លោក មាស រិទ្ធី និពន្ធ​នាយក​ផ្នែក​ព័ត៌មាន និង​ជា​អ្នក​អត្ថាធិប្បាយ​ព័ត៌មាន​សង្គម​នៅ​ស្ថានីយ៍ទូរទស្សន៍​ហង្ស​មាស និង​អ្នកសារព័ត៌មាន​ជើងចាស់​ចំនួន ១៦រូប​ទៀត ត្រូវបាន​សម្តេច សាយ ឈុំ ប្រធានព្រឹទ្ធសភា ប្រមុខរដ្ឋស្តីទី​បានចេញ​ព្រះរាជក្រឹត្យ​មួយ​តែងតាំង​ជាទី​ប្រឹក្សា​ក្រសួង​ព័ត៌មាន​បន្ថែម ខណៈ​អ្នកសារព័ត៌មាន​ជើងចាស់ ២រូប​ទៀត តែងតាំង​ជា​រដ្ឋលេខាធិការ​ក្រសួង​ព័ត៌មាន។

តាម​ព្រះរាជក្រឹត្យ​ចុះ​ថ្ងៃទី ១៤ ខែកញ្ញា ដែល​ចុះហត្ថលេខា​ដោយ​សម្តេច សាយ ឈុំ ប្រធានព្រឹទ្ធសភា ក្នុង​ព្រះ​បរ​ម​នា​ម និង​តាម​ព្រះរាជ​ត្រាស់បង្គាប់​ប្រមុខរដ្ឋស្តីទី បាន​ឲ្យ​ដឹងថា៖ លោក មាស រិទ្ធី និង​អ្នកសារព័ត៌មាន​ជើងចាស់ ១៦រូប​ផ្សេងទៀត​នោះ ត្រូវបានតែងតាំង​ជាទី​ប្រឹក្សា​ក្រសួង​ព័ត៌មាន​ដែលមាន​ឋានៈ​ស្មើនឹង​អនុរដ្ឋលេខាធិការ និង​អគ្គនាយក។

រីឯ​អ្នកសារព័ត៌មាន​ជើងចាស់​លោក ឆាយ សុផល និង​លោក នុត បូ​ផាន់ ត្រូវបានតែងតាំង​ជា​អនុរដ្ឋលេខាធិការ​ក្រសួង​ព័ត៌មាន។

កាលពី​ថ្ងៃទី២៧ ខែកក្កដា​កន្លងទៅនេះ ព្រះករុណា​ព្រះបាទ​សម្តេច​ព្រះបរមនាថ នរោត្តម សីហនុ​មុនី ព្រះមហាក្សត្រ​កម្ពុ​ជា បានចេញ​ព្រះរាជក្រឹត្យ​មួយ​តែងតាំង និង​ផ្តល់​ឋានៈ​ជាទី​ប្រឹក្សា​ក្រសួង​ព័ត៌មាន​ចំនួន ១០៦រូប​ផងដែរ។ ដូច្នេះ​សរុ​បមក​ទីប្រឹក្សា​ក្រសួង​ព័ត៌មាន​បច្ចុប្បន្ន​មាន​ចំនួន១២៣រូប៕