សាឡង់ដឹកខ្សាច់ដែលបុកគឿងជាប់សសរស្ពានព្រែកតាមាក់ ត្រូវបានអូសចេញដោយជោគជ័យ

កណ្ដាល៖ សា​ឡង់​ដឹក​ខ្សាច់​ដែល​បុក​គឿង​ជាប់​សសរស្ពាន​ព្រែ​កតា​មាក់​កាលពីពេល​កន្លងទៅ ត្រូវបាន​ក្រុមការងារ​ប​ច្ចេ​កទេស​អូស​ចេញពី​សសរស្ពាន​បាន​ដោយ​ជោគជ័យ​ហើយ គិត​ត្រឹម​ម៉ោង​ជិត ១២ថ្ងៃត្រង់​ថ្ងៃទី៣០ ខែកញ្ញា​នេះ បន្ទា​ប់​ពី​ស្ថានភាព​ទឹក​ស្រក​ទៅវិញ​ប្រមាណ​ជាង ២ម៉ែត្រ។

ម​ន្រី​ដែលជា​ក្រុម​ប្រតិបត្តិការ​បាន​ឲ្យ​ដឹងថា បន្ទាប់ពី​បូមទឹក​ចេញ​ក្នុង​សា​ឡង់​តាំងពីព្រឹក រហូតមកដល់​ម៉ោង​នេះ ទើប​ក្រុម​ការងារ​បច្ចេកទេស សម្រេច​អូសទាញ​ចេញ​បានតែ​ម្ដង។ ដោយឡែក​សសរស្ពាន​នោះ មិនមាន​ប៉ះពាល់​ពាល់​អ្វី​នោះ​ទេ ខណៈ​សា​ឡង់​ដែល​បុក ក៏មាន​កំប៉ិត​នៅ​ផ្នែក​តួខ្លួន​ចំនួន​ផងដែរ។

ក្រោយ​កើតហេតុភ្លាមៗកាលពី​ថ្ងៃទី៧ ខែកញ្ញា​កន្លងទៅ ក្រុមការងារ​បច្ចេកទេស ដែលមាន​ការចូលរួម​ពី​ស្ថាប័ន​ពាក់​ព័ន្ធ​​ដឹកនាំ​ដោយ​ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួង​សាធារណការ និង​ដឹកជញ្ជូន បានចេញ​ប្រតិបត្តិ​ការ​អូស​ទា​ញ​​យ៉ាង​សស្រាក់សស្រាំ ប៉ុន្ដែ​មិន​ទទួលបាន​ជោគជ័យ​ទេ ដោយសារតែ​ទឹក​ឡើង ហើយ​មាន​ល្បឿ​ង​ហូរ​ខ្លាំង។

លោក ម៉ឹង យូ​ឡេង ប្រធាន​មន្ទីរ​សាធារណការ និង​ដឹកជញ្ជូន​ខេត្តកណ្ដាល​បាន​ថ្លែង​ពី​សប្ដាហ៍​មុន​ថា សា​ឡង់​ដឹក​ខ្សាច់ ១ គ្រឿង របស់លោក ចាន់ ណា បាន​ជួប​ឧបទ្ទវហេតុ​រលត់​ម៉ាស៊ីន ខណៈ​កំពុងធ្វើដំណើរ​ស្របតាម​បណ្ដោយ​ខ្សែទឹក មក​ប្រកៀក​នឹង​ស្ពាន​ព្រែក​តា​មាក់​កាលពី​ល្ងាច​ថ្ងៃអាទិត្យ ហើយ​ត្រូវបាន​ទឹក​ហូរ​កួច​ទៅ​ប៉ះទង្គិច​សសរស្ពាន​បណ្ដា​ល​ឲ្យ​កឿង​ជាប់​លើ​ខឿន​សសរស្ពាន​តែម្ដង។ ប៉ុន្តែ​ក្នុង​ហេតុការណ៍​នោះ ពុំបាន​បង្ក​ឲ្យ​នាវិក​ណា​ម្នាក់​នៅក្នុង​សា​ឡង់​នោះ​រង​របួស ឬ​គ្រោះថ្នាក់​ដល់​ជីវិត​នោះឡើយ។

គួរ​បញ្ជាក់ថា ស្ពាន​ព្រែ​កតា​មាក់​មាន​ប្រវែង​សរុប ១០៦០ ម៉ែត្រ និង​ទទឹង​ប្រវែង ១៣,៥ ម៉ែត្រ​ជាមួយនឹង​ល្បឿន​អតិ​បរ​មា ៦០ គីឡូម៉ែត្រ​ក្នុង ១ ម៉ោង។ ការសាងសង់​ស្ពាន​នេះ ចំណាយ​ថវិកា​ប្រមាណ ៤៣,៥ លាន​ដុល្លារ​ក្រោម​ជំនួយ​ប្រា​ក់​កម្ចី​របស់​ប្រទេស​ចិន និង​បានដាក់​ឲ្យ​ប្រើប្រាស់​នៅ​ឆ្នាំ ២០១០កន្លងទៅនេះ៕