ម្តាយប្រឹងរើសអេតចាយយ៉ាងកំសត់ ដើម្បីឲ្យកូនស្រីតស៊ូរៀនរហូតប្រឡងជាប់បាននិទ្ទេស A

ខេត្តតាកែវ៖ បេក្ខជន​និទ្ទេស A ម្នាក់ ក្នុងចំណោម​សិស្ស​និទ្ទេស A ជាង ៤០០នាក់​ផ្សេងទៀត ឈ្មោះ ស៊ា​ង វ៉ាន់​ថង សិស្ស​វិទ្យាល័យ​សុខ អាន ទន្លាប់ ស្រុក​គីរីវង់ ខេត្តតាកែវ ដែល​រស់នៅក្នុង​គ្រួសារ​ក្រីក្រ និង​មាន​ម្តាយ​ជា​ស្ត្រី​មេម៉ាយ ខណៈ​បច្ចុប្បន្ន​ប្រកបមុខរបរ​ដើររក​អេតចាយ​លក់ ដើម្បី​ឲ្យ​កូនស្រី​បាន​បន្ត​ការសិក្សា និង​ខំប្រឹង​រៀនសូត្រ​ប្រឡង​បាក់​ឌុប​ឆ្នាំ២០១៩ នេះ​ជាប់​បាន​និទ្ទេស A។

បន្ទាប់ពី​យុវតី​រូបនេះ​ទទួលបាន​និទ្ទេស A លោក​ឧ​ញ៉ា ទៀ វិចិត្រ នាយក​ក្រុមហ៊ុន​កាណូត​លឿន ជី.ធី.វី.ស៊ី ស្ពី​ដ​បូត បាន​នាំយក​ម៉ូតូ​សេរី​ថ្មី​មួយគ្រឿង និង​ថវិកា​ចំនួន ៤លាន​រៀល​បន្ថែមទៀត​ទៅ​ឧបត្ថម្ភ​ដល់​ប្អូនស្រី​សិស្ស​ពូកែ​រូបនេះ ដែល​ខំប្រឹង​រៀនសូត្រ​ប្រឡង​បាក់​ឌុប​ឆ្នាំ២០១៩នេះ​ជាប់​បាន​និទ្ទេស A។

កន្លងមក​មហាជន​តែងតែ​មើលឃើញ​តាម​បណ្ដាញ​សង្គម​ហ្វេ​ស​ប៊ុ​កថា លោក​ឧកញ៉ា​តែងតែ​ធ្វើអំពើ​សប្បុរសធម៌​ជួយ​ដល់​ពលរដ្ឋ​ដែល​កំពុង​ខ្វះខាត​ទីទាល់ក្រ ជាហេតុ​ធ្វើ​ឲ្យ​លោក​ទទួលបាន​ការគោរព​ស្រលាញ់​ខ្លាំង​ពី​មហាជន ហើយថ្មីៗនេះ​ទៀតសោធ លោក​ឧកញ៉ា​បាន​លើកទឹកចិត្ត និង​ជួយ​ដល់​សិស្ស​ក្រីក្រ​ដែលមាន​ម្តាយ​ជា​ស្ត្រី​មេម៉ាយ និង​មាន​ប្រកបមុខរបរ​ជា​អ្នក​ដើររក​អេតចាយ នៅ​ភូមិ​ដើម​បេង ឃុំ​គិរី​ចុង​កោះ ស្រុក​គិរីវង់ ខេត្តតាកែវ។

លោក​ឧកញ៉ា ទៀ វិចិត្រ មានប្រសាសន៍ថា ជំនួយ​នេះ​ផ្តល់ជូន​ជាការ​លើកទឹកចិត្ត​ចំពោះ​ការខិតខំ​រៀនសូត្រ​រប​ស់​ប្អូនស្រី និង​ជួយ​ដល់​ជីវភាព​រស់នៅ​របស់​គ្រួសារ​ក្មួយ​ស្រី​ដែល​កំព្រា​ឪពុក រស់នៅ​ជាមួយ​ម្តាយ​មេម៉ាយ​ក្រីក្រ តស៊ូ​ចិញ្ចឹម​កូន​ឲ្យ​រៀនសូត្រ​ទាំង​ជីវភាព​លំបាក។

ក្នុងនោះ ក្រុមគ្រួសារ​ក្មេងស្រី​រូបនេះ បាន​ថ្លែងអំណរគុណ​ចំពោះ​អំពើ​សប្បុរស​ធ​ម៍​របស់លោក​ឧកញ៉ា ទៀ វិចិត្រ និង​គ្រួសារ​របស់លោក​ឧកញ៉ា ដែល​បាន​ជួយឧបត្ថម្ភ​ម៉ូតូ​ថ្មី​មួយគ្រឿង និង​បន្ថែម​ប្រាក់៤លាន​រៀល​ទៀត និង​បាន​គោរព​ជូនពរ​លោក​ឧកញ៉ា​ព្រមទាំង​គ្រួសារ​ឲ្យ​មាន​សុខ​ភាពល្អ​បរិបូ​ណ៍៕