ប៉ុន្មានសំណួររបស់លោក គួច ចំរើន ធ្វើជនសង្ស័យរឿងក្ដីសម្លាប់កាត់កង់ៗ យំហ៊ូ ឡើងចង់ទន់ខ្លួន

ព្រះសីហនុ៖ រឿងក្ដី​សម្លាប់​អ្នក​ប្ដូរប្រាក់​យីហោ​ជាំ​ង​ស៊ូ ស្ថិតនៅ​ក្រុម១៤ ភូមិ៤ សង្កាត់៤ ក្រុង-ខេត្ត​ព្រះសីហនុ​ដែល​ត្រូវ​ជន សង្ស័យ​កាត់​ជាច្រើន​បំណែក​នោះ ម្សិលមិញ​នេះ សមត្ថកិច្ច​ជំនាញ​បានធ្វើការ​ស្រាវជ្រាវ​ចាប់​ជនសង្ស័យ​បាន​ហើយ ជា​ជន​ជាតិចិន​ដូចគ្នា។

ក្រោយ​ចាប់បាន និង​សារភាព​ចប់សព្វគ្រប់​អស់ លោក គួច ចំរើន អភិបាលខេត្ត​ព្រះសីហនុ ក៏បាន​សួរ​ប៉ុន្មាន​សំណួរ​ទៅ​ជនសង្ស័យ​ផ្ទាល់​ថា ចង់​មានឱកាស​ជួប​កូន ជួប​ប្រពន្ធ​ទេ? គ្រាន់តែ​អ្នកបកប្រែ​និយាយ​ចប់ ជនសង្ស័យ​បែរ​យំ​ហ៊ូ ឡើង​ចង់​ទន់​ខ្លួន សោកស្ដាយ​នូវ​កំហុស​របស់ខ្លួន។

សូម​ជម្រាប​ដែរ៖ កាលពី​ថ្ងៃទី 01 ខែតុលា ឆ្នាំ2019 វេលា​ម៉ោង 09 និង 30នាទី មាន​ប្រជាពលរដ្ឋ​បានមក​ប្តឹង​រាយការណ៍​ថា គាត់​បាន​ប្រទះឃើញ​មាន​សាកសព​មិន​ស្គាល់​អត្តសញ្ញាណ នៅ​ចំណុច​ដីឡូត៍​មួយកន្លែង ស្ថិតនៅ​អូរត្រេះ 2 ភូមិ6 សង្កាត់4 ក្រុង-ខេត្ត​ព្រះសីហនុ។ ហើយ​នៅ​ថ្ងៃទី 04 ខែតុលា សមត្ថកិច្ច​ជំនាញ បាន​ចាប់បាន​ជនជាតិ​ចិន​មួយ​នាក់​ឈ្មោះ ZHOU YA YUN ភេទ​ប្រុស អាយុ 29ឆ្នាំ ជនជាតិ​ចិន មុខរបរ ប្តូរប្រាក់ លិខិតឆ្លងដែន​លេ​ខៈ E05801588 ស្នាក់នៅ​ហាង​ប្តូរប្រាក់​ជាំ​ង​ស៊ូ ស្ថិតនៅ​ក្រុម14 ភូមិ4 សង្កាត់4 ក្រុង-ខេត្ត​ព្រះសីហនុ។

ជនសង្ស័យ​បាន​សារភាពថា ករណីនេះ​កើតឡើង​ដោយសារ ជនរងគ្រោះ ឈ្មោះ WU CHENGHUI ភេទ​ប្រុស ជនជាតិ​ចិន កើត​នៅ​ថ្ងៃទី 31 ខែធ្នូ ឆ្នាំ1995 មុខរបរ ប្តូរប្រាក់​ដូចគ្នា កាន់​លិខិតឆ្លងដែន​លេ​ខៈ ED7591553 បាន​ទំនាក់ទំនង​ទៅ​ជនសង្ស័យ ដើម្បី​ប្តូរប្រាក់​ចិន ជា​ប្រាក់​ដុល្លារ​អាមេរិក ចំនួន 7 ម៉ឺន​ដុល្លារ លុះ​នៅ​ថ្ងៃទី 30 ខែកញ្ញា ឆ្នាំ 2019 វេលា​ម៉ោង 17 ជនរងគ្រោះ​បាន​ទៅ​ហាង​ប្តូ​ប្រាក់​របស់​ជនសង្ស័យ។ បន្ទាប់ពី​ជនរងគ្រោះ​បាន​វេរ​ប្រាក់​ទៅ​ឲ្យ​ជនសង្ស័យ​រួចរាល់ ហើយ​ការដូរ​លុយ​ខុស​ហាងឆេង 2,100 យ័ន បង្ករ​ទៅជា​ជម្លោះ រហូត​ត្រូវ​ជនសង្ស័យ​ប្រើ​កាំបិត​កាប់ និង​ចាក់​សម្លាប់​ជនរងគ្រោះ​តែម្តង។ បន្ទាប់ពី​សម្លាប់​ជនរងគ្រោះ​រួចហើយ ជនសង្ស័យ​បាន​កាត់​សាកសព​របស់​ជនរងគ្រោះ​ជា 3 កំណាត់ រួច​យក​សាកសព​វេច​ខ្ចប់​ជាមួយ​ភួយ និង​អាវ​ដែល​ធ្វើ​សកម្មភាព និង​ស្បោង​ពណ៌​ខ្មៅ រហូតដល់​ម៉ោង 01 រំលង​អា​ធ្រា​ត្រ ឈានចូល​ថ្ងៃទី 01 ខែតុលា ឆ្នាំ 2019 ជនសង្ស័យ​បាន​ទៅ​ជួល​រថយន្ត ដើម្បី​ដឹក​សាកសព​របស់​ជនរ​ង​គ្រោះ​យកទៅ​ប្លុង​ចោល​នៅ​កន្លែងផ្សេងៗ 2 គ្នា ដោយ​កំណាត់​ទី 1 ពី​ក្បាល​ដល់​ចង្កេះ យកទៅ​ប្លុង​ចោល​នៅ​ដីឡូត៍​មួយកន្លែង ស្ថិតនៅ​អូរត្រេះ 2 ភូមិ6 សង្កាត់4 ក្រុង-ខេត្ត​ព្រះសីហនុ ,កំណាត់​ទី 2 ពី​ចង្កេះ​ដល់​ជង្គង់ យកទៅ​ប្លុង​ចោល​នៅ​ដីឡូត៍​មួយកន្លែង ស្ថិតនៅ​ភ្នំ 96 ភូមិ5 សង្កាត់4 ក្រុង-ខេត្ត​ព្រះសីហនុ ,កំណាត់​ទី3 ពី​ជង្គង់​ដល់​បាតជើង យកទៅ​ប្លុង​ចោល​នៅក្នុង​ព្រៃ ភូមិ​មើល​ស្វា អូរ​តែ​ល 7 ជាន់ ស្ថិតនៅ ភូមិ1 សង្កាត់3 ក្រុង-ខេត្ត​ព្រះសីហនុ៕