អាជ្ញាធរជាតិអប្សរា ចុះកម្ទេចសំណង់ខុសច្បាប់ ២ កន្លែង ដែលសង់ក្នុងតំបន់ការពារបុរាណដ្ឋាន

សៀមរាប៖ នៅថ្ងៃទី ១ ដើមខែវិច្ឆិកា ឆ្នាំ ២០១៩ នេះ ​កម្លាំងចម្រុះ​រួមមាន អាជ្ញាធរ​ជាតិ​អប្សរា អាជ្ញាធរ​ក្រុង​សៀមរាប សាលាសង្កាត់​ជ្រាវ នគរបាល និង​កងរាជអាវុធហត្ថ​ក្រុង​សៀមរាប បាន​ចុះ​ប្រតិបត្តិ​ការរុះ​រើស និងវាយកម្ទេច​សំណង់​​ខុសច្បាប់​ចំនួន ២ កន្លែង​សង់​នៅលើ​ទំនប់​ត្រពាំង​ហែ​ផ្កា ​និង​ទួលគោក​គូ​នៃ​តំបន់​ការពារ​បុរាណ​ដ្ឋា​ន​ត្រពាំង​ហែ​ផ្កា​។

ចំពោះ​សំណង់​ខុសច្បាប់​ទី១ដែល​ត្រូវ​រុះរើ​ជា​របស់លោក ឃន់ សុខន ជា​ប្រភេទ​សំណង់​របង​បេតុង​ធ្វើ​រំលោភ​បំពាន​​លើ​ខ្នង​ទំនប់​ត្រពាំង​ហែ​ផ្កា​ខាងត្បូង មាន​កម្ពស់២,៥០ម៉ែត្រ (ចាក់​ក្រវ៉ាត់ ក​ឥដ្ឋ) បណ្តោយ ៨៧ ម៉ែត្រ គុណ​នឹង ៣៨ ម៉ែត្រ រួម​នឹង​សំណង់​ខ្ចុ​ស​មួយ​ខ្នង ធ្វើ​ពី​ថ្ម​ប្រក់​ក្បឿង មាន​ទំហំ​ប្រហែល៤ម៉ែត្រ​បួន​ជ្រុង និង​បង្គន់​មួយ។

រីឯ​សំណង់​ខុសច្បាប់​ទី ២ ជា​របស់​អ្នកស្រី ពុម សុគន្ធា ជា​សំណង់​របង​ធ្វើ​រំលោភ​ព័ទ្ធជុំវិញ​ទួល​បុរាណ (គោក​គូ) ស្ថិតនៅក្នុង​តំបន់​ការពារ​ត្រពាំង​ហែ​ផ្កា មាន​កម្ពស់២,៥០ម៉ែត្រ (ចាក់​ក្រវ៉ាត់ ក​ឥដ្ឋ) មាន​ទំហំ​ប្រហែល២៤ម៉ែត្រ​បួន​ជ្រុង។

មុននឹង​ធ្វើការ​រុះរើ​នេះ អាជ្ញាធរ​ជាតិ​អប្សរា​ធ្លាប់​បានចេញ​លិខិត​ណែនាំ​ និង​បានផ្តល់​ពេលវេលា​សមស្រប​ឲ្យ​ម្ចាស់​សំណង់​ខុសច្បាប់​ខាងលើ​ធ្វើការ​រុះរើ​ដោយ​ស្ម័គ្រចិត្ត​នៅ​ថ្ងៃទី១៥ ខែតុលា ឆ្នាំ២០១៩។ ប៉ុន្តែ​ដោយ​សង្កេត​ឃើញ​ថា​ពុំមាន​សកម្មភាព​រុះរើ អាជ្ញាធរ​ជាតិ​អប្សរា​ក៏បាន​អញ្ជើញ​ម្ចាស់​សំណង់​ខុសច្បាប់​ទាំងនេះ​មកជួប​ពិភាក្សា​ដោយផ្ទាល់​ចំនួន២ដង​ដើម្បី​ជម្រុញ​ឲ្យ​មានការ​ស្ម័គ្រចិត្ត​រុះរើ​សំណង់​ដោយ​ខ្លួនឯង គឺ​នៅ​ថ្ងៃទី២២ និង ថ្ងៃទី២៤ ខែតុលា ឆ្នាំ២០១៩។

ក្នុង​កិច្ចពិភាក្សា​នោះ លោក ឃន់ សុខន បានទទួល​ស្គាល់​កំហុស​ដែល​បាន​សាងសង់​ខុសច្បាប់​នៅលើ​ខ្នង​ទំនប់​ត្រពាំង​ហែ​ផ្កា និង​បាន​យល់​ព្រមឱ្យ​ក្រុមការងារ​ចម្រុះ​រុះរើ​ដោយ​គ្មាន​ការតវ៉ា ប៉ុន្តែ​ពុំ​ព្រម​រុះរើ​ដោយ​ខ្លួនឯង​នោះ​ទេ។ លុះ​នៅ​ថ្ងៃ​សុក្រ ទី១ ខែវិច្ឆិកា ឆ្នាំ២០១៩ នាពេល​ក្រុមការងារ​ចម្រុះ​ចុះ​អនុវត្ត​ការរុះរើ ទើប​លោក ឃន់ សុខន បាន​ផ្តិតមេដៃ​អនុញ្ញាត​ឲ្យ​ក្រុមការងារ​ធ្វើការ​រុះរើ។ ដោយឡែក អ្នកស្រី ពុម សុគន្ធា ពុំ​ព្រម​ចូលខ្លួន​មក​ពិភាក្សា​ជាមួយ​ក្រុមការងារ​ចម្រុះ​សោះឡើយ៕