ជនបរទេសមកពី ៦ ប្រទេស នៅតែជាប់បម្រាមហាមចូលកម្ពុជា

ភ្នំពេញ៖ បើទោះបី​ស្ថានភាព​ស្ថានភាព​មេរោគ​កូ​វីដ១៩ នៅ​កម្ពុជា មិនទាន់​ដល់​កម្រិត​ប្រកាសអាសន្ន​ស្រប​ពេលដែល​រយៈពេល ៥ ថ្ងៃ​មកនេះ​កម្ពុជា គ្មាន​ករណី​ឆ្លង​ថ្មី ខណៈ​ចំនួន​អ្នកជា​សះស្បើយ​ក៏បាន​កើន​ឡើងជា​លំដាប់ គិត​ចាប់ពី​ថ្ងៃទី១៣ ខែមេសា ឆ្នាំ ២០២០រហូតដល់​ថ្ងៃទី ១៧ ខែមេសា ក៏ពិតមែន​ក្ដី ប៉ុន្តែ​កាលពី​ថ្ងៃទី១៦ ម្សិលមិញ​នេះ ក្រសួងការបរទេស និង​សហប្រតិបត្តិការ​កម្ពុជា បានសម្រេច​បន្ត​ផ្អាក​មិនឱ្យ​ជនបរទេស​មកពី​ប្រទេស​ចំនួន៦ចូលមក​ប្រទេស​កម្ពុជា ឡើយ រហូតដល់​ស្ថានភាព​ការរីក​រាលដាល​នៃ​ជំងឺ​កូ​វីដ១៩ ធូរស្បើយ​ឡើងវិញ​សិន។

បើតាម​លិខិត​របស់​ក្រសួងការបរទេស ដែល​បណ្ដាញ​ព័ត៌មាន The Plus News ទទួលបាន បាន​បញ្ជាក់ថា​ជនបរទេស​ដែល​មកពី​ប្រទេស បារាំង អាល្លឺម៉ង់ អ៊ីរ៉ង់ អ៊ីតាលី អេ​ស្ប៉ា​ញ និង​សហរដ្ឋ​អាម៉េរិក​មិនត្រូវ​អនុញ្ញាត​ឱ្យមក​កម្ពុជា នោះទេ រហូតដល់​ស្ថានភាព​ការរីក​រាលដាល​នៃ​ជំងឺ​កូ​វីដ១៩ធូរស្បើយ​ឡើងវិញ។

លិខិត​ដែល​ត្រូវបាន​ចុះហត្ថលេខា​ដោយ លោក ស៊ា កុសល រដ្ឋលេខាធិការ​ក្រសួងការបរទេស កាល​នៅ​ថ្ងៃទី១៦ ខែមេសា ឆ្នាំ២០២០ ផ្ញើ​ជូនទៅ​ឯក​អគ្គរាជ​រដ្ឋទូត អគ្គ​កុងស៊ុល​និង​កុងស៊ុល​កិត្តិយស​របស់​កម្ពុជា​ប្រចាំ​នៅ​ប្រទេស ៦ខាងលើនេះ បានឱ្យដឹងថា ក្រសួងសុខាភិបាល​បានសម្រេច​ពន្យារ​សុពលភាព នៃ​វិធានការ​ក្នុងការ​ផ្អាក​មិនឱ្យ​ជនបរទេស ដែល​មកពី​បណ្ដា​ប្រទេស​ខាងលើ​ចូលមក​ព្រះរាជាណាចក្រ​កម្ពុជា​នោះទេ។

ជាមួយគ្នានេះ​ការផ្អាក​គោលការណ៍​លើកលែង​ទិដ្ឋាការ ការផ្តល់​ទិដ្ឋាការ​ទេសចរ​ទិដ្ឋាការ​តាម​ប្រព័ន្ធ​អេ​ឡិច​ត្រូ​និ​ច និង​ទិដ្ឋាការ​នៅពេល​មកដល់ ក៏ដូចជា​វិធានការ​សុខាភិបាល​នានា​រួមទាំង​តម្រូវការ​វិ​ញ្ញាប​ន​ប័ត្រ​បញ្ជាក់​សុខភាព និង​ឯកសារ​ធានារ៉ាប់រង​សុខភាព ត្រូវ​ស្ថិតនៅ​ជា​ធរមាន​បន្តទៀត៕