ក្រចេះ: អាជ្ញាធរខេត្តក្រចេះ គ្រោងសាងសង់ផ្ទះសសរ១០០ឡើងវិញនៅពេលឆាប់ៗនេះនៅក្នុងបរិវេណវិហារបុរាណវត្តរការកណ្តាល ស្ថិតនៅក្រុងក្រចេះ ខណៈអាជ្ញាធរកំពុងរុះរើពីទីតាំងចាស់នៅភូមិកោះកណ្ដុរ ឃុំឆ្លូង ស្រុកឆ្លូង ខេត្តក្រចេះ ក្រោយពីម្ចាស់ផ្ទះស្នើសុំរុះរើ ដើម្បីយកដីបែងចែកឲ្យកូន។
សេចក្ដីជូនដំណឹងរបស់មន្ទីរវប្បធម៌ និងវិចិត្រសិល្បៈខេត្តក្រចេះចុះថ្ងៃទី ២៤ ខែមិថុនាបានឲ្យដឹងថា ក្រោយពីទទួលដំណឹងពីម្ចាស់ផ្ទះ ស្នើសុំរុះរើផ្ទះសសរ១០០ ដែលកំពុងស្ថិតនៅក្នុងសភាពទ្រុឌទ្រោម ខ្វះលទ្ធភាពជួសជុល ហើយម្យ៉ាងចង់យកដីទៅចែកឲ្យកូនៗរបស់គាត់។ អាជ្ញាធរចម្រុះខេត្តក្រចេះ ដឹកនាំដោយលោកស្រី ខាំ សុភាព អភិបាលរងខេត្តក្រចេះ រដ្ឋបាលស្រុកឆ្លូង និងមន្ទីរពាក់ព័ន្ធនានា បានចុះសម្របសម្រួលជាមួយម្ចាស់ផ្ទះ ដើម្បីស្នើសុំម្ចាស់ផ្ទះឲ្យបរិច្ចាគសំណង់បុរាណនេះជូនខេត្តថែរក្សាទុកជាសម្បត្តិបេតិកភណ្ឌជាតិ និងសម្រាប់ក្មេងៗជំនាន់ក្រោយបានស្គាល់។
សេចក្ដីជូនដំណឹងបន្តថា ក្រោយបានចរចារជាច្រើនលើករួចមក នៅថ្ងៃទី ០៥ខែឧសភាឆ្នាំ២០២០ ម្ចាស់ផ្ទះបានយល់ព្រមបរិច្ចាគផ្ទះជូនក្រសួងវប្បធម៌ និងវិចិត្រសិល្បៈនូវតម្លៃតបស្នងចំនួន ៨ពាន់ដុល្លារអាមេរិក។ ដោយក្រសួងបានខិតខំស្វះស្វែងរកថវិកា ដើម្បីដោះស្រាយជាមួយម្ចាស់ផ្ទះ ដោយឡែកម្ចាស់ផ្ទះបានរំអុកស្នើសុំឲ្យក្រសួងចុះរុះរើផ្ទះជាបន្ទាន់ បើមិនដូច្នេះទេ គាត់នឹងប្ដូរចិត្តឈប់ប្រគល់ផ្ទះសសរ១០០នេះជូនដល់ក្រសួងថែរក្សាវិញ។
សេចក្ដីជូនដំណឹងបន្ថែមថា នៅថ្ងៃទី ២០ ខែមិថុនានេះ ក្រុមជាងបានចាប់ផ្ដើមរុះរើដំបូលផ្ទះដែលការរុះរើនេះនឹងត្រូវចំណាយពេលប្រមាណជា ១០ថ្ងៃ។ ក្រោយការរុះរើបាន ២ថ្ងៃ ចាប់ផ្ដើមមានព័ត៌មានជាច្រើនបានធ្វើការផ្សព្វផ្សាយក្នុងចេតនាបំផ្លើសការពិតអំពីគោលបំណងនៃការរុះរើផ្ទះសសរ១០០នេះ។
មន្ទីរវប្បធម៌ និងវិចិត្រសិល្បៈខេត្តក្រចេះបញ្ជាក់ថា ការរុះរើនេះមិនមែនជាការបំផ្លាញឡើយ ប៉ុន្ដែជាការរុះរើមួយដែលមានការត្រួតពិនិត្យត្រឹមត្រូវ ហើយមានការពិគ្រោះយោបល់ជាមួយក្រុមបុរាណវិទូ ស្ថាបត្យករ និងវិស្វករជំនាញរបស់ក្រសួងវប្បធម៌ និងវិចិត្រសិល្បៈ។ គោលបំណងចម្បងនៃការរុះរើ គឺបញ្ជៀសការខូចខាតគ្រឿងឈើឲ្យបានតិចតួចបំផុត ព្រោះក្រសួងមានបំណងយកសំណង់នេះទៅសាងសង់ឡើងវិញនៅក្នុងបរិវេទវត្តរការកណ្ដាល ស្ថិតនៅក្រុងក្រចេះដែលជាទីតាំងសំណង់វត្តបុរាណដ៏ល្បីល្បាញមួយរបស់ខេត្ត និងថ្នាក់ជាតិ។ សំណង់ផ្ទះសសរ១០០ នឹងមិនបាត់បង់ទៅណាឡើយ ត្បិតក្រោយការសាងសង់ និងជួសជុលឡើងវិញ ផ្ទះនេះនឹងក្លាយជាទៅសារមន្ទីរ និងជាមរតកសំណង់បុរាណខ្មែរដ៏មានតម្លៃសម្រាប់ជាប្រយោជន៍ដល់កូនចៅជំនាន់ក្រោយបានចូលទស្សនា និងសិក្សាស្រាវជ្រាវ។
ម្ចាស់ផ្ទះសសរ១០០ ដែលស្ថិតនៅភូមិកោះកណ្ដុរ ឃុំឆ្លូង ស្រុកឆ្លូង ខេត្តក្រចេះនៅថ្ងៃទី ២៤ ខែមិថុនានេះ The Plus News មិនទាន់អាចស្វែងរកប្រភពទាក់ទងសុំការបញ្ជាក់បន្ថែមបានទេ។
គួររំឭកថា ផ្ទះសសរ១០០ ស្ថិតនៅភូមិកណ្តុរ ឃុំឆ្លូង ស្រុកឆ្លូង ខេត្តក្រចេះ បានចាប់ផ្តើមរុះរើកាលពីថ្ងៃ២១ ខែមិថុនា កន្លងទៅនេះ ក្រោយពីក្រសួងវប្បធម៌ និងវិចិត្រសិល្បៈ បានសម្របសម្រួលជាមួយម្ចាស់ផ្ទះ ដោយបានប្រគល់ថវិកាចំនួន ៨ពាន់ដុល្លារទៅឲ្យម្ចាស់ផ្ទះ ដើម្បីធ្វើការរុះរើផ្ទះបុរាណនេះ ទៅធ្វើការសាងសង់ឡើងវិញ។
ផ្ទះបុរាណសសរ១០០នេះ មានអាយុកាលជាង ២០០ឆ្នាំ ដែលកាលពីដើមផ្ទះបុរាណនេះ មានឈើប្រណីតចំនួន ១០០ដើម ប៉ុន្តែកាលពីសម័យប៉ុល ពត បានរុះរើល្វែងមុខ នឹងល្វែងវែងក្រោយអស់ខ្លះ ហើយមកដល់សព្វថ្ងៃនេះ នៅសល់ត្រឹម ៤០ដើមប៉ុណ្ណោះ៕
