អង្គការ WCS បានទទួលអណ្តើកហ្លួងចំនួនពីរក្បាល (ញីមួយក្បាលទម្ងន់ ២០គីឡូក្រាម និងឈ្មោលមួយក្បាលទម្ងន់ ១៥គីឡូក្រាម) ដែលជាប្រភេទសត្វដែលជិតផុតពូជបំផុត ពីក្រសួងបរិស្ថាន ដើម្បីយកទៅលែងចូលក្នុងទីជម្រកធម្មជាតិវិញ។
អណ្តើកទាំងពីរក្បាលនេះ ត្រូវឈ្មួញចាប់យកមកលក់នៅម្តុំគល់ស្ពានស្រែអំបិល ខេត្តកោះកុង និងត្រូវបានលោកស្រី ឡាយ ផុនថេង ធ្វើដំណើរកម្សាន្តឆ្លងកាត់ទៅកាន់ខេត្តកោះកុង នាំយកមកប្រគល់ជូនក្រសួងបរិស្ថាន។
បន្ទាប់ពីបានផ្ទៀងផ្ទាត់មើលលេខសម្គាល់អត្តសញ្ញាណនៅលើបន្ទះឈីប (Micro chip)ដែលបានបង្កប់នៅក្នុងជើងខាងស្តាំរបស់វាមក អង្គការ WCS បានបញ្ជាក់ថា អណ្តើកហ្លួងទាំងពីរនេះត្រូវបានអង្គការ WCS សហការជាមួយរដ្ឋបាលជលផល យកទៅចិញ្ចឹមថែទាំនៅក្នុងមជ្ឈមណ្ឌលអភិរក្សសត្វល្មូនខេត្តកោះកុង ដោយអណ្តើកឈ្មោលបានកើតក្នុងខែឧសភា ឆ្នាំ២០០៦ និងអណ្តើកញីបានកើតក្នុងខែឧសភា ឆ្នាំ២០១០ និងបានលែងវាចូលទៅក្នុងប្រព័ន្ធព្រែកស្រែអំបិលវិញ ដោយអណ្តើកឈ្មោលបានលែងនៅក្នុងខែកក្កដា ឆ្នាំ២០១៥ និងអណ្តើកញីបានលែងនៅក្នុងខែវិច្ឆិកា ឆ្នាំ២០១។
ជាងនេះទៀត ទាំងអាជ្ងាធរ និងអង្គការ WCS និងដៃគូជាច្រើនកំពុងធ្វើការរួមគ្នាដើម្បីទប់ស្កាត់ការចាប់ និងការជួញដូរខុសច្បាប់នូវប្រភេទអណ្តើកជិតផុតពូជនានាក្រោមគម្រោង «ដៃគូប្រយុទ្ធប្រឆាំងបទល្មើសសត្វព្រៃគាំទ្រដោយសហភាពអឺរ៉ុប»។
ពិធីប្រគល់-ទទួលដែលបានរៀបចំឡើង កាលពីព្រឹកថ្ងៃទី២៤ ខែមិថុនា ឆ្នាំ២០២០ត្រូវបានរៀបចំឡើងក្រោមអធិបតីភាព លោក នេត្រ ភក្ត្រា រដ្ឋលេខាធិការក្រសួងបរិស្ថាន និងមានការអញ្ជើញចូលរួមពីមន្ត្រីជំនាញនៃក្រសួងបរិស្ថាន៕
