រដ្ឋកំណត់យក​ថ្ងៃ ៧ មករា មួយទៀត សម្រាប់លើកលែងទោស និងបន្ធូបន្ថយទោសប្រចាំឆ្នាំ

ភ្នំពេញ៖ ព្រះករុណាព្រះបាទសម្ដេចព្រះបរមនាថ នរោត្តមសីហមុនី ព្រះមហាក្សត្រ​កម្ពុជា ​​បា​ន​ចេ​ញព្រះរាជ​ក្រឹត្យមួយ​ស្ដីពី​ការ​បន្ធូរបន្ថយទោស និងលើកលែងទោសដល់ទណ្ឌិតនៅក្នុងប្រទេសកម្ពុជា ក្នុងនោះទិវាជ័យជំនះលើរបប​ប្រល័យពូជសា​ស​ន៍​ដែលត្រូវថ្ងៃ ៧មករា ត្រូវបាន​កំណត់យក​សម្រាប់លើកលែងទោស និងបន្ធូបន្ថយទោសប្រចាំឆ្នាំដែរ។

​ព្រះរាជក្រឹត្យនេះ មានគោលដៅកំណត់អំពីពិធីបុណ្យ លក្ខខណ្ឌ បែបបទ និងនីតិវិធីក្នុងការបន្ធូរបន្ថយទោស និងលើក​លែ​ង​ទោ​ស ចំពោះទណ្ឌិតក្នុងគោលបំណង ដើម្បីធ្វើសមាហរណកម្មទណ្ឌិតនោះ ឱ្យចូលទៅរួមរស់ក្នុងសង្គម​វិញ ឬក្នុង​គោល​បំ​ណ​ងផ្នែកមនុស្សធម៌។

ព្រះរាជក្រឹត្យ​ក៏មានវិសាលភាពគ្របដណ្ដប់ទៅលើការបន្ធូរបន្ថយទោស និងលើកលែងទោស ចំពោះទណ្ឌិត​ទាំងអស់​ដែល​ត្រូវ​បា​នផ្ដន្ទាទោសដាក់ពន្ធនាគារ ដោយសាលក្រម ឬសសាលដីកាស្ថាពររបស់តុលាការកម្ពុជា និងចំពោះទណ្ឌិត ដែល​ត្រូវ​បា​នផ្ដន្ទាទោសដាក់ពន្ធនាគារ ដោយអំណាចតុលាការនៃរដ្ឋបរទេស ប៉ុន្តែត្រូវបានបញ្ជូនឲ្យមកអនុវត្តទោសនៅកម្ពុជា ដោយផ្អែកតាមការព្រមព្រៀងរវាងព្រះរាជាណាចក្រកម្ពុជា និងរដ្ឋបរទេសនោះ។

តាមរយៈព្រះរាជក្រឹត្យនេះ ជារៀងរាល់ឆ្នាំពិធីបុណ្យដែលអាចស្នើ​សុំការបន្ធូរបន្ថយទោស​និងលើកលែង​ទោសដល់​ទណ្ឌិត​បា​នមានចំនួន ៥ ពិធីបុណ្យ ក្នុងនោះមានដូចជា ទី១-ទិវាជ័យជំនះលើរបបប្រល័យពូជសាសន៍ ទី២-ពិធីបុណ្យ​ចូល​ឆ្នាំ​ថ្មី​ប្រ​ពៃណីជាតិ ទី៣-ពិធីបុណ្យវិសាខបូជា ទី៤-ពិធីបុណ្យឯករាជ្យជាតិ និងទី៥-ពិធីបុណ្យអុំទូក បណ្ដែតប្រទីប និងសំពះព្រះ​ខែ អ​កអំបុក៕