សម្តេច ហ៊ុន សែន៖​ ​រំពឹងថា មុន​​ចូលឆ្នាំ​ខ្មែរ​ ​វ៉ាក់សាំង​កូ​វី​ដ​១​៩​ ​នឹង​ចាក់​ជូនពលរដ្ឋ​​បាន៥​០​ម៉ឺន​នាក់

ក្នុង​ពិធីសម្ពោធ​អគារ​ទីស្តីការ​ថ្មី​ក្រសួងសាធារណការ​ ​និង​ដឹកជញ្ជូន​ ​រួម​ទាំង​សម្ពោធ​វិទ្យាស្ថាន​ តេជោ​សែន​ ​សាធារណការ​ ​និង​ដឹកជញ្ជូន​ ​នា​ព្រឹក​ថ្ងៃ​ទី​២​២​ ​ខែ​មករា​ ​ឆ្នាំ​២​០​២​១​នេះ​ ​សម្តេច​នាយករដ្ឋមន្ត្រី​ ​ហ៊ុន​ ​សែន​ ​ថ្លែង​ថា​ ​នឹង​ទៅ​ទទួលយក​ជំនួយ​វ៉ាក់សាំង​ពី​ចិន​ដោយខ្លួនឯង​ ​នៅពេលដែល​វ៉ាក់សាំង​មកដល់​ព្រ​លាន​យន្ដហោះ​ ​ហើយ​ចាក់​មុនគេ​ទៀត​នៅ​មន្ទីរពេទ្យ​កាល់​ម៉ែត្រ​។​

សម្តេច​នាយករដ្ឋមន្ត្រី​ ​បន្ត​ថា​ ​ការ​ទទួលយក​វ៉ាក់សាំង​ពី​ប្រទេស​ចិន​នា​ពេលនេះ​ ​ទោះបី​អង្គការសុខភាព​ពិភពលោក​មិនទាន់​ប្រកាស​ជា​ផ្លូវការ​ក៏ដោយ​។​ ​ក្នុងកំលុង​ពេល​កម្ពុជា​កំពុង​រង​ការ​យាយី​ដោយ​ជំងឺ​កូ​វី​ដ​១​៩​នេះ​ ​មិន​អាច​រង់ចាំ​ទៀត​ទេ​ ​គឺ​ត្រូវតែ​ស្វះស្វែង​រក​វ៉ាក់សាំង​ចាក់​ជូន​ប្រជាពលរដ្ឋ​ដោយ​ឥត​គិតថ្លៃ​និង​ដោយ​ស្ម័គ្រចិត្ត​។​

​សម្តេច​នាយករដ្ឋមន្ត្រី​ ​ហ៊ុន​ ​សែន​ ​បាន​បញ្ជាក់​ថា​ ​ការ​ចាក់​វ៉ាក់សាំង​ ​គឺ​ឈ​រលើ​គោលការណ៍​ស្ម័គ្រចិត្ត​ ​ដូច្នេះ​នរណា​ចង់​ចាក់​ក៏​ចាក់​ ​បើ​មិន​ចង់​ចាក់​ក៏​មិន​បង្ខំ​ដែរ​។​ ​ទោះបីជា​យ៉ាងណា​សម្តេច​នាយករដ្ឋមន្ត្រី​ ​យល់ឃើញ​ថា​ ​ការ​ចាក់​វ៉ាក់សាំង​នេះ​ ​នឹង​ដើរតាមគន្លង​ដូចជា​តម្រូវ​ឱ្យ​ចាក់​វ៉ាក់សាំង​ជំងឺគ្រុនចាញ់​មុន​ចូល​ទៅ​អាហ្វ្រិក​។​ ​ដូច្នេះ​រឿង​វ៉ាក់សាំង​កូ​វី​ដ​១​៩​នេះ​ ​អាច​ប៉ាន់ស្មាន​ថា​ ​ទៅ​ថ្ងៃមុខ​ប្រទេស​នានា​អាច​ទាមទារ​លិខិត​បញ្ជាក់​ពី​ការ​ចាក់​វ៉ាក់សាំង​លើ​បុគ្គល​ណា​ម្នាក់​មុន​អនុញ្ញាត​ឱ្យ​ចូល​ប្រទេស​គេ​។​

​សម្តេច​នាយករដ្ឋមន្ត្រី​ ​ហ៊ុន​ ​សែន​ ​បាន​បង្ហាញ​ក្តី​រំពឹង​ថា​ ​មុន​ពេល​ចូលឆ្នាំ​ខ្មែរ​ ​វ៉ាក់សាំង​កូ​វី​ដ​១​៩​ ​នឹង​ចាក់​ជូន​ប្រជាពលរដ្ឋ​បាន​៥​០​ម៉ឺន​នាក់​។​

​ជាមួយនឹង​គ្នា​នេះ​ ​កម្ពុជា​បាន​ផ្ញើ​លិខិត​មួយ​ច្បាប់​ទៅកាន់​នាយករដ្ឋមន្ត្រី​ចិន​ ​និង​ជួប​ជជែក​ជាមួយ​ឯកអគ្គរដ្ឋទូត​ចិន​ប្រចាំ​នៅ​កម្ពុជា​ ​ដើម្បី​ជជែក​និង​រិះរក​យន្ត​ការ​ទទួល​បាន​វ៉ាក់សាំង​។​ ​តាម​ការ​ជជែក​នោះ​ ​កម្ពុជា​ទទួល​ជំនួយ​ពី​ចិន​ ​ឬ​ខ្ចី​ថវិកា​ចិន​ ​រួច​ទិញ​វ៉ាក់សាំង​ចិន​ទាំងពីរ​ ​គឺ​ស៊ី​ណូ​ហ្វា​ម​និង​ស៊ី​ណូ​ហ្វា​ក់​។​ ​ជាង​នេះ​ទៅទៀត​ ​កម្ពុជា​បាន​សរសេរ​លិខិត​មួយ​ច្បាប់​ផ្ញើ​ទៅ​នាយករដ្ឋមន្ត្រី​ឥណ្ឌា​រួចហើយ​ ​ដើម្បី​ស្នើសុំ​វ៉ាក់សាំង​មក​ចាក់​ជូន​ប្រជាពលរដ្ឋ​ ​និង​បាន​ពិចារណា​សរសេរ​លិខិត​ស្នើសុំ​វ៉ាក់សាំង​ពី​កូរ៉េ​ខាងត្បូង​ ​ព្រមទាំង​កំពុង​ពិចារណា​និង​សិក្សា​លើ​វ៉ាក់សាំង​របស់​ប្រទេស​អង់គ្លេស​ផង​ដែរ​។​ ​នេះ​ជា​ការ​បញ្ជាក់​បន្ថែម​របស់​សម្ដេច​នាយករដ្ឋមន្ត្រី​ ​ហ៊ុន​ ​សែន​។​

សម្តេច​នាយករដ្ឋមន្ត្រី​ ​ហ៊ុន​ ​សែន​ ​មានប្រសាសន៍ថា​ ​វ៉ាក់សាំង​ជំងឺ​កូ​វី​ដ​១​៩​ ​គឺជា​ទំនិញ​យុទ្ធសាស្ត្រ​ ​ឯ​ការស្វែងរក​វ៉ាក់សាំង​កូ​វី​ដ​១​៩​នេះ​ ​មាន​ច្រក​បី​ ​គឺ​ច្រក​អង្គការសុខភាព​ពិភពលោក​ ​ច្រក​ប្រទេស​ជា​មិត្ត​ ​និង​ច្រក​ចរចា​ផ្ទាល់​ជាមួយ​ក្រុមហ៊ុន​ផលិត​វ៉ាក់សាំងកូវីដ១៩៕​