លោក ឃួង ស្រេង លេងធម៌ក្តៅកាន់រំពាត់ដេញពលរដ្ឋឲ្យចូលផ្ទះ ដូចឪពុកម្ដាយប្រដៅកូន

ភ្នំពេញ: អភិបាលរាជធានីភ្នំពេញលោក ឃួង ស្រេង នៅថ្ងៃទី២១ ខែមេសានេះ បានឲ្យដឹងថា ការកាន់រំពាត់របស់សមត្ថកិច្ចដេញប្រជាពលរដ្ឋឲ្យចូលផ្ទះ គឺគ្រាន់តែគំរាមប្រជាពលរដ្ឋដែលនៅតែគឃ្លើនប៉ុណ្ណោះ ប៉ុន្ដែមិនមែនជាការប្រើប្រាស់អំពើហិង្សាទេ។

លោក ឃួង ស្រេង ត្រូវបាន Fresh News ដកស្រង់សម្ដីថា ការកាន់រំពាននេះប្រៀបដូចជាឪពុកម្ដាយ ឬអាណាព្យាបាល ប្រដៅកូនចៅខ្លួនឯងតែប៉ុណ្ណោះ។


លោកបន្ថែមថា ក្នុងករណីប្រជាពលរដ្ឋនៅតែមិនស្ដាប់អាជ្ញាធរណែនាំ ត្រូវឃាត់ខ្លួនភ្លាមៗ ហើយកសាងសំណុំរឿងចាត់ការបន្ដតាមនីតិវិធី ពិសេសចាប់ផាកពិន័យតាមច្បាប់កំណត់តែម្ដង។

ការចេញមកបកស្រាយរបស់លោក ឃួង ស្រេង ធ្វើឡើងបន្ទាប់ពីគេសង្កេតឃើញថា កងកម្លាំងមានសមត្ថកិច្ចបានកាន់រំពាត់ ដើរគំរាមប្រជាពលរដ្ឋ ដែលនៅតែបន្ដដើរចេញក្រៅផ្ទះមិនស្ដាប់ និងអនុវត្តតាមការណែនាំរបស់រាជរដ្ឋាភិបាល ក្នុងការបិទខ្ទប់ភូមិសាស្ដ្ររាជធានីភ្នំពេញ និងដាក់ជាតំបន់ក្រហម ដើម្បីទប់ស្កាត់ការឆ្លងរីករាលដាលជំងឺកូវីដ១៩។

ទោះ យ៉ាងណាសង្កេតឃើញថា បន្ទាប់ពីកម្លាំងអាជ្ញាធរ និងសមត្ថកិច្ច បានកាន់រំពាត់ដើរគំរាមប្រជាពលរដ្ឋនោះ ពួកគាត់ក៏មានការខ្លាចរអារ និងមិនហ៊ានចេញក្រៅផ្ទះទេ៕