អាជ្ញាធរខេត្តកណ្តាលដាក់កំហិតឧ្យរុះរើបែរត្រី និងផ្ទះបណ្តែតទឹក តាមដងទន្លេ ក្នុងស្រុកល្វាឯម ស្រុកកៀនស្វាយ និងស្រុកលើកដែក

ខេត្តកណ្តាល៖ អភិបាលខេត្តកណ្តាលលោក គង់ សោភ័ណ្ឌ បានដាក់បទបញ្ជាយ៉ាងម៉ឺងម៉ាត់ដល់អាជ្ញាធរស្រុកនៅតាមដងទន្លេក្នុងភូមិសាស្ត្រខេត្តកណ្តាល ត្រូវមានវិធានការអោយបានម៉ឹងម៉ាត់ ចំពោះបែរត្រី ផ្ទះបណ្តែតទឹក ផ្ទះទូកតូចៗ នៅក្នុងភូមិសាស្ត្ររបស់ខ្លួនតាមវិធានការច្បាប់។

លោក គង់ សោភ័ណ្ឌ អភិបាលខេត្តកណ្តាល បានចុះត្រួតពិនិត្យផ្ទះបណ្តែតទឹក បែរត្រី ដែលខុសច្បាប់ក្នុងភូមិសាស្ត្រស្រុកកៀនស្វាយ ស្រុកល្វាឯម និងស្រុកលើកដែកនៅថ្ងៃទី១៣ ខែ មិថុនា ឆ្នាំ ២០២១។

ក្នុងការចុះត្រួតពិនិត្យនេះលោកបានជ្រុញដល់អាជ្ញាធរពាក់ព័ន្ធ ត្រូវមានវិធានការអោយបានតឹងរឹង តាមនិតិវិធីច្បាប់ដោយគ្មាននការយោគយល់ចំពោះបែត្រី និងផ្ទះបណ្តែតទឹកដែលខុសច្បាប់។

អភិបាលបានបន្តថា អាជ្ញាធរស្រុកត្រូវចាត់អោយមានកងកម្លាំងយាមល្បាតគ្រប់ពេលវេលា និងហាមមិនមានបែរត្រី ផ្ទះបណ្តែតទឹកចូលចតក្នុងមូលដ្ឋានខ្លួនជាដាច់ខាត ហើយត្រូវគ្រប់គ្រងស្ថិតិ បែរត្រី ផ្ទះបណ្តែតទឹក ទាំងចាស់ទាំងថ្មីអោយបានច្បាស់លាស់បំផុត ដើម្បីរៀបចំសណ្តាប់ធ្នាប់តាមដងទន្លេឡើងវិញ សំរួលដល់ផ្លូវនាវាចរ និងប្រព័ន្ធអេកូឡូហ្ស៊ី ជៀសវៀងការខូខាត់ធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និង ប៉ះពាល់ដល់សោភ័ណ្ឌភាពតាមដងទន្លេ និងសុខភាពរបស់ប្រជាពលរដ្ឋដែលបានប្រើប្រាស់ទឹកក្នុងទន្លេជាប្រចាំថ្ងៃផងដែរ៕