អាជ្ញាធរ ចុះពិនិត្យទីលានទុកដាក់សំរាម និងសំណល់រឹងនៅខេត្តព្រះសីហនុ

រដ្ឋបាលខេត្តព្រះសីហនុ បានចុះពិនិត្យទីលានទុកដាក់សំរាម និងសំណល់រឹងទីប្រជុំជន ស្ថិតនៅភូមិអូរតាសេក ឃុំអូរឧកញ៉ាហេង ស្រុកព្រៃនប់កាលពីទី១២ ខែតុលា ឆ្នាំ២០២១។

លោក គួច ចំរើន អភិបាល នៃគណៈអភិបាលខេត្តព្រះសីហនុ បានលើកឡើងថា កំណើនប្រជាពលរដ្ឋ អ្នកវិនិយោគ និងអាជីវកម្មផ្សេងៗ ដែលធ្វើឱ្យកាកសំណល់ក៏មានការកើនឡើងដូចគ្នា ដូច្នេះយើងត្រូវ ប្រមូលព័ត៌មាន ដើម្បីរៀបចំផែនការយុទ្ធសាស្រ្តឆ្លើយតបទៅនឹងតម្រូវការ របស់ប្រជាពលរដ្ឋក្នុងការគ្រប់គ្រងសំរាម។

សូមបញ្ជាក់ថាទីលានទុកដាក់សំរាម និងសំណល់រឹងទីប្រជុំជននេះគឺសាងសង់នៅលើផ្ទៃដីទំហំ ១៧ហិកតា នៃ ផ្ទៃដីសរុបប្រមាណ ៥០ហិតា ស្ថិតនៅភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ នៅពេលដាក់ដំណើរការទីលាន ថ្មីនេះ គឺធ្វើឱ្យក្រុមហ៊ុនប្រមូលសំរាម មានភាពងាយស្រួល ក្នុងការគ្រប់គ្រ កាកសំណល់បានល្អ និងកាត់បន្ថយផលប៉ះពាល់បរិស្ថាននៅជុំវិញទីលានផងដែរ។

លោកអភិបាលខេត្ត ក៏បានបញ្ជាក់បន្ថែមថា ទីលានទុកដាក់សំរាម និងសំណល់រឹងទីប្រជុំជននេះ គឺជា ទីលានគំរូមួយ សម្រាប់ការគ្រប់គ្រងសំរាម ដើម្បីលើកកម្ពស់បរិស្ថានសម្រាប់ខេត្តព្រះសីហនុ។ ក្នុងនោះ ឯកឧត្តមអភិបាលខេត្ត បានលើកទឹកចិត្តដល់អ្នកវិនិយោគ ឱ្យមកបណ្តាក់ទុនលើការកែច្នៃសំរាម និងឡដុតបំលែងសំរាមទៅជាថាមពលអគ្គិសនី។ល។

ទន្ទឹមនឹងនេះ លោកអភិបាលខេត្ត ក៏បានធ្វើការណែនាំឱ្យលោកអភិបាលស្រុកព្រៃនប់ និងលោកប្រធានមន្ទីរបរិស្ថានខេត្ត រៀបចំឯកសារធ្វើប្លង់ទីតាំងទុកដាក់សំរាមនេះ ដើម្បីគ្រប់គ្រងជាដីសាធារណៈរបស់រដ្ឋ និងការប្រើប្រាស់រយៈពេលយូរអង្វែង។ ទីលានទុកដាក់សំរាម និងសំណល់រឹងទីប្រជុំជន នៅឃុំអូរឧកញ៉ាហេងនេះ គឺអាចទទួលយកសំរាមចេញពីក្រុងព្រះសីហនុ និងស្រុកព្រៃនប់ ទន្ទឹមនេះរដ្ឋបាលខេត្ត គ្រោងសិក្សាទីតាំងសម្រាប់ទុកដាក់សំរាម និងសំណល់រឹងនៅស្រុកស្ទឹងហាវ ស្រុកកំពង់សីលា និងក្រុងកោះរ៉ុងបន្តទៀត៕