រាជធានីភ្នំពេញ៖ បន្ទាប់ពីមានគេបង្ហោះរឿងសកម្មភាពមន្ត្រីប៉ូលិសម្នាក់ផាកពិន័យអ្នកជិះម៉ូតូ ៥ ម៉ឺនរៀល ហើយត្រូវគេ Share ពេញបណ្ដាញសង្គមនោះ ពេលនេះលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានសម្រេចផ្អាកការងារបណ្តោះអាសន្នដល់មន្ត្រីរូបនោះហើយ។ 
មន្ត្រីប៉ូលីសដែលត្រូវផ្អាកការងារបណ្តោះអាសន្នមានឈ្មោះថា ស៊ីម ប៊ុនធឿន នាយរងផ្នែកការពារ និងអន្តរាគមន៍ចំណុះអធិការដ្ឋាននគរបាលខណ្ឌមានជ័យ នៃស្នងការដ្ឋាននគរបាលរាជធានីភ្នំពេញ។ យោងតាមលិខិតនោះ បានបញ្ជាក់ថា សាមីខ្លួន (លោក ស៊ីម ប៊ុនធឿន) ត្រូវមកបង្ហាញមុខនៅការិយាល័យបុគ្គលិក រៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី។
ចំពោះមូលហេតុនៃការផ្អាកនេះ គឺដោយសារ លោកអនុសេនីយ៍ឯក ស៊ីម ប៊ុនធឿន ផាកពិន័យមិនត្រឹមត្រូវ មិនចេញបង្កាន់ដៃ តាមការកំណត់។ នេះបើតាមលិខិតបង្គាប់ការរបស់លោកឧត្តមសេនីយ៍ឯក ស ថេត នៅថ្ងៃទី១១ ខែមិថុនា ឆ្នាំ២០១៩៕
សកម្មភាពមន្ត្រីប៉ូលិសដែលត្រូវបានគេថតបាន
