ប្រទេសជប៉ុន៖ ក្រោយមានគ្រោះរញ្ជួយដីក្នុងកម្រិតខ្ពស់រហូតដល់ 6.8 រិកទ័រ បានបង្កឲ្យលំនៅដ្ឋាន និងមនុស្សជាច្រើនរង់គ្រោះ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន បានចេញសេចក្ដីប្រកាសភ្លាមៗ បងប្អូនប្រជាពលរដ្ឋ សិស្ស/និស្សិត និងសិក្ខាកាមខ្មែរ ដែលកំពុងមានវត្តមាន នៅប្រទេសជប៉ុន មានការប្រុងប្រយ័ត្ន ខណៈគ្រោះថ្នាក់នេះ អាចបង្កជារលកយក្សស៊ូណាមិ ចំពោះតំបន់ឆ្នេរ នៃខេត្ត Yamagata, Niigata និង Ishikawa ។
ជាមួយនឹងសេចក្ដីប្រកាសនេះ ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុនស្ថានទូត បានអំពាវនាវដល់បងប្អូនប្រជាពលរដ្ឋ សិស្ស/និស្សិត និងសិក្ខាកាមខ្មែរទាំងអស់មេត្តាឋិតនៅឲ្យឆ្ងាយពីតំបន់មាត់សមុទ្រនៃខេត្តទាំងបីខាងលើនេះ។ ក្នុងករណីមានបងប្អូន មានព័ត៌មានអំពីប្រជាពលរដ្ឋ សិស្ស/និស្សិត ឬសិក្ខាកាមខ្មែរដែលរស់នៅក្នុងតំបន់នោះ ទទួលរងផលប៉ះពាល់ សូមមេត្តាជូនដំណឹងមកស្ថានទូតជាបន្ទាន់តាមរយៈ៖
– ហ៊្វេសប៊ុក របស់ស្ថានទូត Royal Embassy of Cambodia in Japan-在日本国カンボジア王国大使館
– ទូរស័ព្ទលេខ 080 4689 9374 ឬ 080 3459 7889
គួរបញ្ជាក់ថា គ្រោះរញ្ជួយដីលើកនេះ ក៏បានបណ្ដាលឲ្យផ្ទះសម្បែងជាង 5 ពាន់ខ្នងដាច់ភ្លើងក្នុងអាណាខេត្ត Yamagata ខណៈ 2,800 ខ្នងទៀតមិនមានអគ្គិសនីប្រើប្រាស់ក្នុងខេត្ត Niigata នៅម៉ោង 11:50នាទីយប់ ហើយផ្លូវហាយវ៉េ និងផ្លូវជាច្រើន ក៏ត្រូវបានបិទបណ្ដោះអាសន្នដោយសារថ្មធ្លាក់មកលើផងដែរ៕
