ភ្នំពេញ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃសម្តេច ស ខេង នៅថ្ងៃទី ២៩មិថុនានេះ បានដាក់កំហិត និងដាស់តឿនមន្រ្តីដឹកនាំខេត្តព្រះសីហនុឲ្យថែរក្សាអត្តសញ្ញាណជាតិ ក្នុងអំឡុងពេលការអភិវឌ្ឍខេត្តមួយនេះ តាមរយៈការរៀបចំស្លាកសញ្ញា ស្លាកយីហោនានា ត្រូវតែដាក់អក្សរខ្មែរពីលើជានិច្ច ហើយអក្សរបរទេសដាក់ពីខាងក្រោម។
ការក្រើនរំលឹកនេះ ខណៈសម្តេច ស ខេង បានធ្វើឡើងក្នុងឱកាសដែលអញ្ជើញជាអធិបតីប្រកាសផ្ទេរតំណែងអភិបាលខេត្តព្រះសីហនុ ពីលោក យន្ត មីន មកលោក គួច ចំរើន នៅព្រឹកថ្ងៃទី២៩ ខែមិថុនា ឆ្នាំ២០១៩នេះ។
សម្តេច ស ខេង បានថ្លែងថា៖ ការអភិវឌ្ឍក្នុងខេត្តព្រះសីហនុ ត្រូវរក្សាឲ្យបានដាច់ខាតនូវអត្តសញ្ញាណជាតិ ដើម្បីឲ្យអ្នកទេសចរចូលមកលេងកម្សាន្ត និងវិនិយោគបានដូចគ្នា។ ខ្ញុំគាំទ្រកន្លងទៅផ្លាកសញ្ញានានា យើងបានកែសម្រួល តែសុំឲ្យបន្តទៅទៀត។ យើងដើរមើលប្រទេសណា គេដាក់អក្សរប្រទេសគេណុងហើយ អក្សរបរទេសគេដាក់ខាងក្រោម។
ការក្រើនរំឭកផងដែរ បន្ទាប់សម្ដេចបានឃើញកន្លងមកធ្លាប់មានការប្រតិកម្មយ៉ាងច្រើនចំពោះការលើកស្លាកសញ្ញានានានៅក្នុងខេត្តព្រះសីហនុ ដែលភាគបង្ហាញអក្សរចិនពីលើ ហើយពេលខ្លះសរសេរអក្សរខ្មែរខុសឆ្គងជាច្រើនផងដែរ។ ក្រៅពីស្លាកសញ្ញានៅតាមបញ្ជីមុខម្ហូបនៅតាមភោជនីយដ្ឋាន និងអាហារដ្ឋានជាដើម ភាគច្រើនប្រើតែអក្សរបរទេសដោយមិនរំលេចអក្សរខ្មែរផងដែរ។
ក្រោយពីមានការប្រតិកម្មខ្លាំងពីមហាជននោះ អាជ្ញាធរបានចុះចាត់វិធានការ និងមានកែសម្រួលជាច្រើនរួចហើយ៕
