អ្នកគូររូបថ្លុកដ៏ល្បីសញ្ជាតិកាណាដាម្នាក់ ត្រូវបានគេបញ្ឈប់ពីការងារភ្លាមៗ បន្ទាប់ពីរូបគាត់បានគូរ និងបង្ហោះរូបថ្លុកមួយបែបចម្អកទៅដល់ប្រធានាធិបតីសហរដ្ឋអាមេរិក លោក ដូណាល់ ត្រាំ កំពុងឈរនៅក្បែរសាកសពជនចំណាកស្រុកពីរនាក់ឪពុកកូន។
រូបថ្លុកមួយសន្លឹកនោះ ត្រូវបានលោក Michael de Adder បង្ហោះចូលទៅក្នុងគណនី Twitter ផ្ទាល់ខ្លួន កាលពីថ្ងៃទី ២៦ ខែមិថុនា ឆ្នាំ ២០១៩ កន្លងទៅនេះ ហើយវាត្រូវបានគេចែកចាយពេញពិភពអ៊ីនធើណេត និងត្រូវបានចុះផ្សាយដោយ ក្រុមហ៊ុនកាសែត Brunswick News Inc. នៅក្នុងខេត្ត New Brunswick នៃប្រទេសកាណាដា។
ក្រោយបានប៉ុន្មានថ្ងៃ លោក Adder ត្រូវបានក្រុមហ៊ុនដែលគាត់ធ្វើបញ្ចប់កុងត្រាមុនពេលកំណត់ ក្រោមហេតុផលមិនច្បាស់លាស់ ដោយថាវាមិនមែនព្រោះតែរូបថ្លុកនោះទេ។ សម្រាប់រូបថ្លុកនោះ ត្រូវបានលោក Michael de Adder បង្ហាញពីលោក ត្រាំ កំពុងឈរនៅក្បែរឡានកូនហ្គោល ជាមួយនឹងដងវាយកូនហ្គោលរបស់គាត់នៅក្នុងដៃ ខណៈដែលកំពុងសម្លឹងមើលទៅក្រោមទៅលើសាកសពឪពុក និងកូនស្រី ដែលបានលង់ទឹកស្លាប់ ខណៈព្យាយាមឆ្លងកាត់ទន្លេ Rio Grande ពីប្រទេសម៉ិកស៊ិក ចូលទៅកាន់រដ្ឋតិចសាស់ សហរដ្ឋអាមេរិក អមជាមួយឃ្លា “Do You Mind If I Play Through?” ដែលមានន័យថា “តើអ្នកប្រកាន់ទេ ប្រសិនបើខ្ញុំលេងកាត់ទីនេះ?”៕
ប្រភព៖ CNN
