ក្ដីស្នេហា ពេលខ្លះពិបាកពន្យល់ ព្រោះមើលមិនឃើញ ស្មានមិនត្រូវ។ អ្នកខ្លះខំរង់ចាំអស់ច្រើនឆ្នាំ បែរចៃដន្យមកជួបអ្នកនៅក្បែរគ្នា ឯអ្នកខ្លះទៀត មិនទាំងធ្លាប់ស្គាល់គ្នាផង ក៏ផ្ដើមស្រលាញ់ទាំងនឹកស្មានមិនដល់។ ចំណែកនារីម្នាក់ ដែលជាអ្នកលក់ផលិតផលអនឡាញនោះ បានជួបស្នេហ៍ពិតជាមួយអតិថិជន រហូតក្លាយជាសង្សារ ហើយចុងក្រោយក៏ភ្ជាប់ពាក្យជាគូដណ្ដឹងបញ្ជាក់ចិត្តស្មោះ។
ម្ចាស់គណនី ដែលមានឈ្មោះ Nov Dalin បានសរសេររៀបរាប់ថា៖
“មនុស្សប្រុសដែលគ្រាន់តែឃើញយើងហើយស្រលាញ់យើងនោះ មានច្រើណាស់! តែបើមនុស្សប្រុសដែលអាចទទួលយកគ្រប់យ៉ាងពីយើង ស្រលាញ់យើង និងច្បាស់លាស់ជាមួយយើង ហើយយើងចង់នៅជាមួយចាប់ដៃគ្នាទៅមុខនោះមានតែម្នាក់ប៉ុណ្ណោះ។ ពីអ្នកទិញនិងអ្នកលក់ ក៏ក្លាយជាសង្សារ។ នៅជាមួយគ្នាយល់ពីគ្នា ស្រលាញ់គ្នាទំនាក់ទំនងក៏កាន់តែល្អនោះ ពេលនេះក៏ក្លាយជាគូរដណ្តឹង។អរគុណបងណាស់សម្រាប់គ្រប់យ៉ាងជិតមួយឆ្នាំពេញនេះ។ បងស្រលាញ់អូន មើលថែអូន ប្រាប់ដំបូន្មានល្អៗប្រដៅអូន ជួយគ្នាទៅវិញទៅមក ក៏មិនដែលទុកអូនចោលពេលអូនលំបាក និងថែទាំអូននិងស្រលាញ់គ្រួរសារអូនដូចគ្រួសារបងទៀត។ ទើបតែនៅជាមួយគ្នាជិតមួយឆ្នាំទេ តែបងធ្វើរឿងល្អជាច្រើន និងខំសាងគ្រប់យ៉ាងទៅថ្ងៃមុខ ក៏មិនដែលសាងកំហុសដែលខុសមកលើគ្នាដែរ ផ្តល់ការទុកចិត្តគ្នាទៅវិញទៅមកកាន់តែច្រើនទៀតណា៎។ អរគុណប៉ាម៉ាក់សងខាងផងដែរ!”។
ត្រូវដឹងថា ស្នេហាពិតមិនគិតលើរូបរាង និងទ្រព្យសម្បត្តិឡើយ ហើយការរៀបការជាមួយមនុស្សដែលខ្លួនស្រលាញ់ គឺជារឿងដែលមានន័យបំផុត។ អាពាហ៍ពិពាហ៍ដ៏មានន័យបំផុត មានតែម្ដងគត់ក្នុងជីវិត ដូចនេះហើយទើបមនុស្សម្នាក់ៗព្យាយាមគិតគូរយ៉ាងល្អិតល្អន់មុនសម្រេចចិត្តទទួលយក។
ការស្រលាញ់គ្នារវាងមនុស្សពីរនាក់ បង្កើតចេញជាចំណងស្នេហាមិនអាចកាត់ផ្ដាច់បាន រហូតឈានជើងចូលរោងការកសាងអនាគតរួមគ្នា។ នេះគឺជាមូលហេតុសាមញ្ញបំផុត បង្កើតជាអាពាហ៍ពិពាហ៍ប្រកបដោយភាពផ្អែមល្ហែមមិនចេះរីងស្ងួតទៅថ្ងៃមុខ ព្រោះម្នាក់ៗសុទ្ធតែមានចិត្តលើគ្នា។ត្រូវទទួលយកចំណងអាពាហ៍ពិពាហ៍ពេលជួបមនុស្សដែលស្រលាញ់ពិត បង្កើតស្នេហាចេញពីចិត្ត អាចដើរផ្លូវរួមគ្នាទៅអនាគត។
មុនសម្រេចចិត្តរៀបការ ត្រូវគិតឲ្យបានគ្រប់ជ្រុងជ្រោយ ចំណុចល្អរបស់ខ្លួនឯង ចំណុចអាក្រក់របស់ខ្លួនឯង អ្វីដែលខ្លួនមានគេអាចទទួលបាន ឬទេ។ ចំណែកចំណុចអាក្រក់របស់គេវិញ អ្នកអាចទទួលបានឬអត់។ ថ្ងៃក្រោយ ពេលឈ្លោះគ្នា អ្នកអាចអត់ទ្រាំបានកម្រិតណា។
សេដ្ឋកិច្ចអ្នកទាំងពីរ អាចល្មមគ្រប់គ្រាន់សម្រាប់បង្កើតគ្រួសារមួយហើយឬនៅ។ ត្រូវបង្កើតការស្រលាញ់ចេញពីចិត្ត អាណិត មេត្តា អធ្យាស្រ័យ យោគយល់ នោះចំណងអាពាហ៍ពិពាហ៍អ្នក នឹងប្រកបទៅដោយភាពផ្អែមល្ហែម គ្មានអ្វីអាចមកបំបែកបានឡើយ។ជឿជាក់ថា មនុស្សភាគច្រើនគិតលើរូបសម្បត្តិមែន ប៉ុន្តែពេលរៀបការរួច ទើបដឹងថាខ្លួនឯងគិតខុស ព្រោះចិត្តមិនមែនចេះតែត្រូវគ្នានោះទេ។ មុនសម្រេចចិត្តរៀបការ សួរខ្លួនឯងឱ្យច្បាស់ថា ចង់បានគ្រួសារមានសុភមង្គលចេះយល់ចិត្តគ្នា ឬយកគូស្នេហ៍ដើម្បីបង្អួតភ្នែកអ្នកដទៃ។ កុំខ្វល់នឹងភ្នែកគេ កុំខ្វល់នឹងសម្ដីគេ ព្រោះចុងក្រោយ គឺអ្នកទាំង២ ជាអ្នករស់នៅជាមួយគ្នា ដើម្បីអនាគតអ្នកទាំង២ មិនមែនដើម្បីអ្នកដទៃឡើយ៕
ប្រភព៖ ហ្វេសប៊ុក
