មួយសប្ដាហ៍ក្រោយចូលកាន់តំណែងឯកឧត្ដម គួចចំរើន ធ្វើការមិនដាក់ដៃ

ក្រុងព្រះសីហនុ៖ ក្រោយ​ចូលកាន់​តំណែង​បាន​ត្រឹម​មួយ​សប្ដាហ៍​ បន្ទាប់​ពី​សម្ដេច​សម្រាប់​សម្រេច​ផ្ទេរ ឯកឧត្ដម ពី​អភិបាល​ខេត្ត​កំពង់ចាម មក​កាន់​តំណែង​ជា​អភិបាល​ខេត្ត​ព្រះសីហនុកាល​ពី​ថ្ងៃ​ទី ២៩ ខែមិថុនា ឆ្នាំ ២០១៩ កន្លង​ទៅ ឯកឧត្ដម គួចចំរើន ធ្វើ​ការ​មិន​ដាក់​ដៃ ហើយ​ត្រូវ​បាន​មហាជន​កោតសរសើរ​មិន​ដាច់​ពី​មាត់​ ទៅ​លើ​សកម្មភាព​ធ្វើ​ការ​របស់​ឯកឧត្ដម  ក្នុង​ការ​ដោះស្រាយ​បញ្ហា​សំខាន់ៗ​​ចំពោះ​មុខ​នៅ​ក្រុង​ព្រះសីហនុ​។

ឯកឧត្ដម គួចចំរើន ធ្លាប់​បាន​បញ្ជាក់​ក្នុង​គណនី Facebook ផ្លូវការ​របស់​ឯក​ឧត្ដម​ថា” មន្ត្រី​រាជការ​ត្រូវ​មាន​ សាមគ្គីភាព​ និង​ទំនួល​ខុសត្រូវ​ ក្នុង​ការ​បំពេញ​ការងារ ទៅ​តាម​តួនាទី​ និង​ភារកិច្ច​ដែល​បាន​កំណត់​ដោយ​ច្បាប់​។”

ឯកឧត្ដម ក៏​បាន​ស្នើ​សូម​ឲ្យ​មន្ត្រី​រាជការ​ទាំងអស់​គប្បី​កុំ​ធ្វើ​ការងារ​តាម​ទម្លាប់​ ត្រូវ​ធ្វើការទៅ​តាម​ច្បាប់​ និង​លិខិត​បទដ្ឋាន​គតិយុត្តិ​នានា​ ព្រោះ​ថាច្បាប់​ លិខិត​បទដ្ឋាន​គតិយុត្តិ​នានា​ តែងតែ​វិវត្តន៍​ពីមួយថ្ងៃ​ ទៅ​មួយ​ថ្ងៃ​ ទៅ​តាម​ការ​រីក​ចម្រើន​នៃ​សង្គម​ជាតិ​យើង​។

តាម​រយៈ​កិច្ច​ខិត​ប្រឹង​បំពេញ​ភារកិច្ច​នេះ ត្រូវ​បាន​ប្រជាពលរដ្ឋ​ជា​ច្រើន​សាទរ និង​កោតសរសើរ​មិន​ដាច់​ពី​មាត់​ ថា​អភិបាល​ខេត្ត​ល្អ ​តាំង​ពី​ខេត្ត​កំពង់ចាម រហូត​ដល់​ពេល​នេះ​។

ក្នុង​រយៈពេល​មួយ​សប្ដាហ៍​នេះ ឯកឧត្ដម គួចចំរើន ដោយ​បាន​ដឹក​នាំ​មន្ទីរ​ អង្គភាព​ មន្ត្រី​ជំនាញ​នានា​ដែល​ពាក់ព័ន្ធ​ចុះ​ស្វែងយល់​ និង​ពិនិត្យ​ផ្លូវ​សំខាន់​ៗ ចុះ​ពិនិត្យ​ស្ថានភាព​ អូរ​ប្រឡាយ​ និង​តំបន់​មួយ​ចំនួន​ដែល​រង​ផល​ប៉ះ​ពាល់​ស្ថិត​ក្នុង​ភូមិសាស្ត្រ​សង្កាត់​លេខ ៤ និង​បាន​ឲ្យ​អាជ្ញាធរ​ មន្ទីរ​អង្គភាព​ជំនាញ​ពាក់ព័ន្ធ​សិក្សា​បច្ចេកទេស​ត្រឹមត្រូវ ដើម្បី​ស្តារ​អូរ​ប្រឡាយ​ ​បញ្ជៀស​ការ​លិចលង់​លំនៅឋាន​របស់​ប្រជាពលរដ្ឋ​ក្នុង​តំបន់​នោះ​។

ក្រៅ​ពី​នេះ ឯកឧត្ដម ក៏​បាន​ជួប​ជាមួយ​នឹង​បងប្អូន​ប្រជាពលរដ្ឋ​ក្រុង​ព្រះសីហនុ​ ដើម្បី​កែ​លម្អ តំបន់​ឆ្នេរ​ទាំង​អស់ នៅ​ខេត្ត​ព្រះសីហនុ ឲ្យ​មាន​សោភណភាព​ ស្រស់​ស្អាត ​ដូច​ជា​ក្រាល​ឥដ្ឋ​ការ៉ូឡា ​សម្រាប់​​ពលរដ្ឋ​ធ្វើ​ដំណើរ​លំហែ​ រៀប​ចំ​សណ្ដាប់ធ្នាប់​ អនាម័យ និង​បរិស្ថាន​ឲ្យ​ស្រស់​បំព្រង​ផងដែរ។

យ៉ាងណាមិញ ទាំងនេះ គ្រាន់តែជាផ្នែកតូចមួយដែលយើងបានមើលឃើញប៉ុណ្ណោះ ដោយ​មាន​កិច្ច​ការ​ជាច្រើនទៀត ដែលឯកឧត្ដម នឹងត្រូវធ្វើ ដើម្បីបម្រើដល់សេចក្ដីត្រូវរបស់ប្រជាពលរដ្ឋ៕