ឯកឧត្តមទេសរដ្ឋមន្ដ្រី ស៊ុន ចាន់ថុល៖ “យើងត្រូវពង្រឹង និងពង្រីកការកសាង និងស្តារហេដ្ឋារចនាសម្ព័ន្ធដឹកជញ្ជូន ដែលជាសរសៃឈាមសេដ្ឋកិច្ចជាតិ ប្រកបដោយគុណភាព”

ព្រះសីហនុ៖ ក្នុងជួប​សំណេះសំណាល និង​សាកសួរ​សុខទុក្ខ​មន្ត្រីរាជកា​រ នៃ​មន្ទីរ​សាធារណការ និង​ដឹកជញ្ជូន​ខេត្ត​ព្រះសីហនុ កាលពីថ្ងៃទី០៩ ខែកក្កដា ឆ្នាំ២០១៩ នេះ ឯកឧត្តម​ទេសរដ្ឋមន្ត្រី ស៊ុន ចាន់ថុល បានថ្លែងថា “យើង​ត្រូវ​ពង្រឹង និង​ពង្រីក​ការកសាង និង​ស្តារ​ហេដ្ឋារចនាសម្ព័ន្ធ​ដឹកជញ្ជូន ដែលជា​សរសៃឈាម​សេដ្ឋកិច្ចជាតិ ប្រកប​ដោយ​​គុណភាព” ។

ថ្លែង​ក្នុង​ពិធី​នោះ ឯកឧត្ដម​ទេសរដ្ឋមន្ត្រី បាន​សង្កត់ធ្ងន់ថា ៖ ការស្ដារ​ហេដ្ឋារចនាសម្ព័ន្ធ​ដឹកជញ្ជូន​ឡើងវិញ ជាពិសេស​ហេដ្ឋារចនាសម្ព័ន្ធ​ដឹកជញ្ជូន នៅ​ខេត្ត​ព្រះសីហនុ គឺជា​ការចាំបាច់ ព្រោះថា​ផ្លូវ​គឺជា​សរសៃឈាម​សេដ្ឋកិច្ចជាតិ ដូចនេះ​យើង​ត្រូវ​ពង្រឹង និង​ពង្រីក​ការកសាង​ហេដ្ឋារចនាសម្ព័ន្ធ​ដោយ​ប្រកាន់​ភ្ជាប់​នូវ​ចក្ខុវិស័យ គឺ​ធ្វើ​ផ្លូវ​ឱ្យបាន​មាំ។

ជាមួយគ្នា​នោះ​ផងដែរ ឯកឧត្ដម​ទេសរដ្ឋមន្ត្រី​ក៏បាន​បង្ហាញប្រាប់នូវ​គម្រោង​កំពុង​អនុវត្ត និង​គម្រោង​ដែល​នឹងត្រូវ​អនុវត្ត​របស់​ក្រសួង​សាធារណការ និង​ដឹកជញ្ជូន​ទាក់ទង​នឹង​ហេដ្ឋារចនាសម្ព័ន្ធ​ដឹកជញ្ជូនសំខាន់ៗមួយចំនួន​ដូចជា៖ ផ្លូវជាតិ​លេខ២ ផ្លូវជាតិ​លេខ៣ ផ្លូវជាតិ​លេខ៤ ផ្លូវជាតិ​លេខ៨ ស្ពាន និង​កំពង់ផែ ដោយ​លើកកម្ពស់​គុណភាព និង​ពង្រីក​បន្ថែម​ឱ្យ​សម​ស្របតាម​ការរីកចម្រើន​លើ​វិស័យ​ដឹកជញ្ជូន​របស់​ប្រទេសជាតិ។

ឯកឧត្ដម​ទេសរដ្ឋមន្ត្រី បាន​គូសបញ្ជាក់ថា៖ ទន្ទឹមនឹង​ការងារ​សាងសង់ ក្រសួង​សាធារណការ និង​ដឹកជញ្ជូន មាន​តួនាទី​ផ្ដល់​សេវាសាធារណៈ​ជូន​បងប្អូន​ប្រជាពលរដ្ឋ​ឱ្យបាន​លឿន ប្រសិទ្ធភាព និង​តម្លាភាព ធ្វើយ៉ាងណា​បង្ខិត​សេវាសាធារណៈ​ឱ្យ​ជិត​ប្រជាពលរដ្ឋ តាមរយៈ​ការចុះបញ្ជី​យានយន្ត ការប្រឡង​យក​បណ្ណ​បើកបរ និង​ការត្រួតពិនិត្យ​លក្ខណៈ​បច្ចេកទេស​យានយន្ត​តាម​ប្រព័ន្ធ​អន​ឡាញ និង​កម្មវិធី​ថែទាំ​ផ្លូវ ROAD CARE Mobile App ជាដើម៕