ឧកញ៉ា គួច ម៉េងលី ឧបត្ថម្ភថវិកា ៥ ពាន់ដុល្លារ ដល់ក្រុមយុវជនសំរាម

រាជធានីភ្នំពេញ៖ បន្ទាប់ពីប្រធាន​ក្រុមយុវជន​សំរាម​បឹងត្របែក លោក សាន ដា​រ៉ា​វីដ ប្រកាស​រក​ជំនួយបន្ទាប់ពី​រូបលោក បាន​សេង​អាជីវកម្ម លក់​ឡាន លក់​ម៉ូតូ​អស់ហើយ នៅ​ទូរ​សព្ទ័​ត្រឹម iPhone X មួយគ្រឿង​បែកកា​មេរ​រ៉ា និង​ស្គ្រី​ន​មុខ ពេលនេះ លោក​ឧកញ៉ា វេជ្ជបណ្ឌិត គួច ម៉េង​លី ឧបត្ថម្ភ​ថវិកា ២០ លាន​រៀល ឬ​ស្មើនឹង ៥ ពាន់​ដុល្លារ និង​សម្ភារ​ប្រើប្រាស់​មួយចំនួន ដើម្បី​រួមចំណែក​ថែរក្សា លើកកម្ពស់​សោភណភាព និង​កាត់បន្ថយ​ផលប៉ះពាល់​បរិស្ថាន នៅ​រាជធានី​ភ្នំពេញ។

ជាមួយគ្នានេះ ក្រុមយុវជនសំរាមទាំងនោះ ក៏ទទួលបានផ្តល់​ការព្យាបាល ដោយ​ឥតគិតថ្លៃ​ផងដែរ នៅ​មជ្ឈមណ្ឌល​សុខភាព​សិស្ស ម៉េង​លី ជេ. គួច។ ទន្ទឹមនឹងនេះ សិស្សានុសិស្ស មជ្ឈមណ្ឌល​ភាសា អេ អាយ អាយ និង​សាលារៀន អន្តរទ្វីប អាមេរិកាំង ក៏​ចូលរួម​ស្ម័គ្រចិត្ត​ដើរ​រៃ​អង្កា​ស​ថវិកា​ពី​សប្បុរសជន​នានា ដើម្បី​ជួយ​ផ្គត់ផ្គង់​ដល់​សកម្មភាព​នេះ៕