មិន​ធម្មតា រុស្ស៊ី​លុត អារ៉ាប៊ី សាអូឌីត ម៉ា​ចាស់​ដៃ​នៅ​ថ្ងៃ​បើ​ឆាក World Cup លើ​ទឹកដី​​ខ្លួន(មានវីដេអូ)

កាល​ពី​ថ្ងៃ​ទី ១៤ ខែ​មិថុនា ឆ្នាំ​២០១៨ ​ព្រឹត្តិការណ៍ នៃ​ការ​ប្រកួត​ពានរង្វាន់​បាល់ទាត់​ពិភព​លោក​ «World Cup» ម្ចាស់​ផ្ទះ​រុស្ស៊ី​បាន​យក​ឈ្នះ​ ក្រុមជម្រើសជាតិ អារ៉ាប៊ី សាអូឌីត  ៥ទល់នឹង០ ក្រោម​ការ​ដឹកនាំ​ក្រុម​ជម្រើស​ជាតិ​រុស្ស៊ី​ដោយ​លោក Stanislav Cherchesov។

ស្ថិត​ក្នុង​កីឡាដ្ឋាន Luzhniki Stadium នៃ​ជំនួប​ពូលA​ ក្រុម​ជម្រើស​ជាតិ​រុស្ស៊ី​លេង​បាល់​បាន​យ៉ាង​ល្អ​ហើយ​មាន​លទ្ធភាព​នាំ​មុខ ២​ គ្រាប់​នៅ​តង់ទី១ ដែល​តែត​​បំប៉ោង​សំណាញ់​គ្រាប់​ទី១ដោយខ្សែការពារ Yuri Gazinskiy នៅនាទី១២ និងគ្រាប់ទី២ធ្វើ​សម្រេច​ដោយ​ខ្សែបម្រើ Denis Cheryshev នៅនាទី៤៣។

ឈាន​ចូល​ដល់​តង់​ទី​២​ម្ចាស់​ផ្ទះ​នៅ​តែ​បន្ត​វា​លុប​លើ​គូ​ប្រជែង​ ដែល​អាច​ស្វែងរក​៣​គ្រាប់​បន្ថែម​ គ្រាប់ទី១​ សម្រេច​ដោយ​ខែ្សប្រយុទ្ធ Artem Dzyu នៅ​នាទី ៧១ ខណៈ​ដែល​២​គ្រាប់​ទៀត​អាច​រក​បាន​នៅ​នាទី ៩០ ដោយ​ខ្សែ​បម្រើ Denis Cheryshev និង Aleksandr Golovin ស៊ុត​បាល់ Free kick យ៉ាង​ល្អ​មុខ​អាជ្ញាកណ្ដាល​ផ្លុំកញ្ចែ​បញ្ចប់​ការ​ប្រកួត​។

ជា​រួម ម្ចាស់​ផ្ទះ​រុស្ស៊ី​បាន​យក​ឈ្នះ​ ក្រុម​ជម្រើសជាតិ អារ៉ាប៊ី សាអូឌីត  ៥ទល់នឹង០ មាន​៣​ពិន្ទុ​ក្នុង​ដៃ​ឈរ​លើ​កំពូល​តារាង​នៃ​ពូល A​ បណ្ដោះអាសន្ន​៕
សូមទស្សនាវីដេអូខាងក្រោមនេះ៖