មឿន សុខហ៊ុច គឺជាកីឡាករប្រដាល់ជួរមុខរបស់កម្ពុជាមួយរូប ត្រូវបានក្រុមគ្រូពេទ្យផ្អាកមិនឲ្យឡើងសង្វៀនរយៈពេលមួយខែ បន្ទាប់ពីរយៈពេលចុងក្រោយនេះ រូបគេធ្លាក់ទម្រង់ប្រកួតជាខ្លាំង ដោយប្រកួតសន្លប់ ៣ដង និងចាន់ពិន្ទុ ១ដង ក្នុងអំឡុង៤សប្តាហ៌ជាប់គ្នា ខណៈដែលការប្រកួតចុងក្រោយ កាលពីថ្ងៃអាទិត្យ មឿន សុខហ៊ុច ត្រូវបានអាជ្ញាកណ្តាលបញ្ឈប់នៅដើមទឹកទី ៣ បន្ទាប់ពីកីឡាករថៃ Rong Napha របស់ថៃ ទាត់ឲ្យដួល និងមានរបួសជើងក្រោម និងរាប់ចំនួន ៣ ។
លោកវេជ្ជបណ្ឌិត ឆឹង យ៉ៅយ៉េន បានបន្ថែមថា៖ «ទោះបីជាមានការផ្សព្វផ្សាយ និងដាស់តឿនជារឿយៗក្តី ប៉ុន្តែមិនសូវមានប្រសិទ្ធភាព និងយកចិត្តទុកដាក់ទេ ព្រោះកីឡាករខ្លះ គ្រូបង្វឹកខ្លះភ្ជាប់ទំនាក់ទំនងកិច្ចសន្យាជាមួយស្ថានីយទូរទស្សន៍ផ្ទាល់ធ្វើឲ្យមានកម្មវិធីប្រកួតសឹងតែរាល់សប្តាហ៍គឺ ១ សប្តាហ៍ម្តង ដើម្បីបានប្រាក់ភ្លេចគិតពីសុខភាព»។
ប្រភព: ភ្នំពេញប៉ុស្តិ៍
