Xiaomi ដាក់ចេញ Black Shark 2 Pro ជាមួយកម្លាំងម៉ាស៊ីនឡើងកប់!

ក្រោយគ្នាតែបន្តិចបន្ទាប់ពី Asus ដាក់ចេញស្មាតហ្វូនកំពូលហ្គេម ROG 2 ប្រើបន្ទះឈីប Snapdragon 855+ ពេលនេះក្រុមហ៊ុន Xiaomi ក៏មិននៅស្ងៀមដែរ ដោយបាន​ដាក់​ចេញ​ស្មាតហ្វូន​ឆ្លាម Black Shark 2 Pro បំពាក់បន្ទះឈីបកម្លាំងកប់ដូចគ្នា។

Black Shark 2 Pro មាន​អេក្រង់ 6.39 អ៊ី​ញ ជា​ប្រភេទ AMOLED អាច​បង្ហាញ​ក្នុង​កម្រិត FHD+ , អាច​ស្គេ​ន​ម្រាមដៃ​នៅលើ​អេក្រង់ និង​មាន Speakers ចំនួន 2 គ្រាប់ ហើយមានកម្លាំង​ម៉ាស៊ីន​ខ្លាំង​ជាមួយ​បន្ទះឈីប Snapdragon 855+ អម​ជាមួយ​រ៉េ​ម 12GB និង​ជម្រើស​ទំហំ​ផ្ទុក​ខាងក្នុង 128GB / 256GB  ដែល​អាច​ទ្រទ្រង់​ជាមួយនឹង UFS 3.0។ សម្រាប់ជំនាន់ថ្មីនេះ វាបានបំពាក់នូវប្រព័ន្ធ Liquid Cooling 3.0 ដោយបាន​បន្ថែម​ជាមួយនឹង បន្ទះ និង បំពង់​ត្រជាក់ Liquid-cooled ។

ចំពោះ​ផ្នែក​កាមេរ៉ា​វិញ គឺ​វា​បំពាក់​មក​ជាមួយនឹង ខាងក្រោយ​ចំនួន 2 គ្រាប់ ដោយ​គ្រាប់​ទីមួយ មាន​ទំហំ 48MP F/1.75 និង​គ្រាប់​ទី​ពីរ​មាន​ទំហំ 12MP F/2.2។ ខាងមុខ​មាន​មួយ​គ្រាប់​ទំហំ 20MP F/2.0។ ទៅលើ​ថាមពល​ថ្ម វា​ផ្ទុក​បាន​ទំហំ 4000mAh ដែល​អាច​ទ្រទ្រង់​ជាមួយនឹង​ដុំ​សាក 27W បាន​ក្នុង​ការជួយ​អោយ​ការ​សាក កាន់តែ​លឿន​រហ័ស​បន្ថែមទៀត។

Black Shark 2 Pro នេះ នឹង​ដាក់លក់​នៅក្នុង​ប្រទេស​ចិន ចាប់ពី​ថ្ងៃទី 2 ខែសីហា ជាមួយនឹង​ពណ៌​ចំនួន 5 គឺ​ពណ៌​ខ្មៅ, ទឹកប្រាក់, ខៀវ, ទឹកក្រូច និង​ស្វាយ ចាប់ពី​តម្លៃ $435 សម្រាប់​ម៉ូ​ឌែ​ល 12GB + 128GB និង $508 សម្រាប់​ម៉ូ​ឌែ​ល 128GB + 256GB៕