ក្រោយបង្ហាញខ្លួនតាំងពីខែមិថុនា ទូរស័ព្ទ ROG Phone មិនទាន់ត្រូវបាន ASUS បង្ហាញតម្លៃផ្លូវការនៅឡើយទេ។ ប៉ុន្តែថ្មីៗនេះ ក្រុមហ៊ុនសេវាទូរស័ព្ទមួយនៅហ្វាំងឡង់ Telia ចាប់ផ្ដើមទទួលការកុម្ម៉ង់ទិញទូរស័ព្ទហ្គេម Asus ROG ដែលយើងបានដឹងនូវតម្លៃសម្រាប់ទីផ្សារប្រទេសហ្វាំងឡង់។
វែបសាយលក់អនឡាញ Telia បានតាំង Asus ROG អមជាមួយលក្ខណៈសម្បត្តិក៏ដូចជាតម្លៃ ៩៩៩អឺរ៉ូ ឬប្រហែល ១១៥០ដុល្លារ (គិតពន្ធ ២៤% រួច) ដូច្នេះបើតម្លៃដុលត្រឹម ៩៣០ដុល្លារប៉ុណ្ណោះ ហើយមានហ្វ្រីកាសស្ដាប់ ROG Delta Headphones ជាមួយ USB Type-C ដែលមានតម្លៃសរុប ១៩០ដុល្លារ។ ស្មាតហ្វូនហ្គេម Asus ROG នេះត្រូវបានផលិតអមជាមួយឡូហ្គោ RGB Republic of Gamers ស្ថិតនៅផ្នែកខ្នង។
អ្នកអាចដោតស្ដាប់កាសបានតាមរន្ធ USB Type-C របស់ AeroActive Cooler បាន។ Asus ក៏បានបញ្ចូលរន្ធកាស 3.5mm នៅលើ Cooler សម្រាប់ប្រើជាមួយទូរស័ព្ទខ្លួនដែរ។ AeroActive Cooler បានភ្ជាប់ជាមួយកូនកង្ហារតូចសម្រាប់ជួយបន្ថយកម្ដៅ ពិសេសគឺចាំបាច់នៅពេលអ្នកកំពុងលេងហ្គេម។ ផ្អែកតាមការតាំងបង្ហាញនេះ សាធារណជនខ្លះរំពឹងថា ស្មាតហ្វូនកម្លាំងកប់ខាងហ្គេមនេះ នឹងចាប់ផ្ដើមចរាចរលើទីផ្សារពីថ្ងៃទី១៧ ខែកញ្ញាខាងមុខ។ វាមិនច្បាស់នៅឡើយថា តើកាលបរិច្ឆេទដាក់ឲ្យបញ្ជាទិញ និងចេញលក់ តើដូចគ្នា ឬប្រហាក់ប្រហែលទៅនឹងបណ្ដាប្រទេសផ្សេងៗឬទេ ប៉ុន្តែគេអាចរំពឹងថា នឹងមិនយូរនោះទេ៕
