ស្មាតហ្វូន Mate 30 Series នឹងបង្ហាញខ្លួនដោយគ្មានកម្មវិធី និងសេវាកម្ម Google

បរទេស៖ ក្រុមហ៊ុន Huawei នឹងដាក់​ចេញ​ស្មា​ត​ហ្វូ​ន​ស៊េរី​ថ្មី​នៅ​ពាក់កណ្ដាល​ខែ​នេះ​ដោយ​គ្មាន​វត្តមាន​កម្មវិធី និង​សេវាកម្ម​របស់​ក្រុមហ៊ុន Google បន្ទាប់ពី​រដ្ឋាភិបាល​ស​ហ​រដ្ឋ​អាមេរិក បានសម្រេច​ចិត្ត ធ្វើ​ការហាម​ក្រុមហ៊ុន​របស់​ក្នុងប្រទេស​ខ្លួន​ឲ្យ​ឈប់​រកស៊ី​ជាមួយ ហើយ​ដាក់​ក្រុមហ៊ុន​ចិន​នេះ​ទៅក្នុង​បញ្ជីខ្មៅ។

តាម​ការចុះផ្សាយ​ពី​វេ​ប​សាយ Nikkei Asian Review បញ្ជាក់ថា Huawei នឹង​សម្ពោធ​ចេញ​ស្មា​ត​ហ្វូ​ន Mate 30/Mate 30 Pro ឬ Mate X នៅ​ថ្ងៃទី 19 ខែកញ្ញា ឆ្នាំ 2019 ដោយ​គ្មាន​កម្មវិធី និង​សេវាកម្ម​របស់​ក្រុមហ៊ុន Google។ ដំណឹង​នេះ​មានន័យថា គ្មាន​ឡើយ Google Play Store ឬ​កម្មវិធី​តំឡើង​មុន ដូចជា Chrome, Gmail, YouTube និង Maps ជាដើម។

សហរដ្ឋអាមេរិក មិនបាន​បង្ហាញ​សញ្ញា​ណាមួយ​ស្ដីពី​ការបន្ទន់​ជំហរ​របស់ខ្លួន ចំពោះ​ក្រុមហ៊ុន​ទូរគមនាគមន៍​ដ៏​ធំ របស់​ចិន​នេះ​នោះទេ។ លោក​ប្រធានាធិបតី ដូ​ណា​ល់​ត្រាំ បានបញ្ជាក់​ជាថ្មី នៅ​ថ្ងៃ​ពុធ ទី 04 ខែកញ្ញា នេះ​ថា ក្រុមហ៊ុន Huawei នៅតែ​ជា​ក្តីបារម្ភ​ចំពោះ​សន្តិសុខ​ជាតិ​អាមេរិក។

លោក​មានប្រសាសន៍ថា“ យើង​នឹងមិន​ធ្វើ​ជំនួញ​ជាមួយ​ក្រុមហ៊ុន Huawei ទេ។ វា​នឹង​បញ្ឈប់​ស្ទើរតែ​ទាំងស្រុង​ក្នុង​រយៈពេល​ដ៏​ខ្លី” ។ ក្នុងនោះ លោក ដូ​ណា​ល់​ត្រាំ ក៏​មិនមាន​គម្រោង​លើក​ពិភាក្សា​អំពី​ការដាក់ទណ្ឌកម្ម​នេះ ក្នុង​កិច្ចចរចា​ពាណិជ្ជកម្ម​ជាមួយ​ប្រទេស​ចិន ដែល​រំពឹងថា​នឹង​ចាប់ផ្តើម​ឡើងវិញ​នៅ​ខែតុលា​ដែរ។

យ៉ាងណាមិញ Huawei ក៏បាន​ត្រៀមខ្លួន​សម្រាប់​ការបាត់បង់​នេះ​រួចហើយ ដោយមាន​ព័ត៌មាន​ខ្លះ​និយាយថា ក្រុមហ៊ុន​ចិន​នេះ នឹង​ប្រើ OS ថ្មី​របស់ខ្លួន​សម្រាប់​ស្មា​ត​ហ្វូ​នក្រោយ។ ក្នុង​អ្នកវិភាគ​មួយចំនួន​លើកឡើងថា វា​អាចទៅរួច ប៉ុន្តែ​វា​ក៏​ពិបាក​ក្នុង​វាយលុក​ទីផ្សារ​ក្រៅ​ស្រុក​ផង ប្រសិនបើ​រឿង​នោះ​កើតឡើង​មែន។

ក្រុមអ្នកវិភាគ​កំពុង​ប៉ាន់​ស្មានថា បើរឿងកើតឡើងមែន នឹងធ្វើឲ្យ​ជះឥទ្ធិពល​ដល់​ការចេញលក់​ស្មា​ត​ហ្វូ​ន​របស់​ក្រុមហ៊ុន Huawei ដោយការលក់​នៅក្រៅ​ប្រទេស​ចិន​អាច​ធ្លាក់ចុះ ៣០% ឬ​ច្រើនជាង​នេះ។ យ៉ាងណាមិញ យើងមិនទាន់អាចបញ្ជាក់ 100% ទេ លុះត្រាស្មាតហ្វូនស៊េរី Mate 30 ​ចេញមកសិន ទើបដឹងច្បាស់៕