Motorola បង្ហាញខ្លួនស្មាតហ្វូនថ្មី Copy រាង iPhone X មកទាំងដុល!

កាលពីពេលថ្មីៗនេះ ក្រុមហ៊ុន Motorola បានធ្វើឲ្យពិភពស្មាតហ្វូនមានការភ្ញាក់ផ្អើល បន្ទាប់ពីក្រុមហ៊ុន​ល្បី​មិន​ដែលចេះចម្លងម៉ូតមួយនេះ ធ្វើការផ្លាស់ប្ដូរគំនិតបង្កើតទូរស័ព្ទ P30 យកគំរូតាម iPhone X ស្ទើរតែទាំងស្រុង រហូត​ទទួលបានរហស្សនាមថាកំពូលអ្នកចម្លងម៉ូតប្រចាំឆ្នាំបន្ទាប់ក្រុមហ៊ុន Xiaomi។

ទូរស័ព្ទ Moto P30 រូបរាងរបស់ Moto P30 គឺចម្លងពី iPhone X ដែលភាសាបរទេសហៅថា Copycat ហើយនេះ គឺជាលើក​​ដំបូង​បំផុត ដែល​ទូរស័ព្ទ Motorola បាត់បង់រចនាបថ និងអត្ដសញ្ញាណរបស់ខ្លួនទាំង​ស្រុង​តែ​ម្ដង ដែល​កាល​ពីមុនមិនធ្លាប់មាននោះទេ ព្រោះយើងធ្លាប់តែឃើញទូរស័ព្ទ Moto ដែលមានរូបរាងមូលៗ ប្លែកពីគេ។

​ Moto P30 ​បំពាក់នូវ​ឈីប Qualcomm Snapdragon 636 ​និង​មាន RAM 6GB ​អម​ដោយ​អង្គ​ចងចាំ​ពីរ​ជម្រើស 64GB ​និង 128GB ​និង​អាច​បន្ថែម microSD ​បាន​ផង​ដែរ។

Motorola P30 ​នេះ មាន​អេក្រង់ 6,2 អ៊ីញ​កម្រិត FHD+ ​នៅ 2246x1080px ជាមួយ​សមាមាត្រ 19:9 aspect ratio ​ហើយ​បំពាក់​ដោយ​ប្រព័ន្ធ​កាមេរ៉ា​សមត្ថភាព​ខ្លាំង​ទាំង​កាមេរ៉ា​មុខ និង​ក្រោយ។ ​កាមេរ៉ា​ក្រោយ​ភ្លោះ​ទំហំ 16MP និង 5MP ​សម្រាប់​ថត​វីដេអូ និង​រូបថត រីឯ​កាមេរ៉ា​មុខ​វិញ​ទំហំ 12MP ​សម្រាប់ selfie ហើយ​មាន​កម្លាំង​ថ្ម 3000mAh និង​ទម្ងន់ ១៧០ក្រាម។ P30 ​នឹង​មាន​លក់​នៅ​លើ​ទីផ្សារ​ចិន​ចាប់ពី​ថ្ងៃ​ទី 15 ខែ​កញ្ញា​ខាង​មុខ ក្នុង​តម្លៃ​ចាប់ពី  2099 យន់ ឬ​ប្រហែល 303 ដុល្លារ​អាមេរិក (គិត​តាម​អត្រា​ប្ដូរ​ប្រាក់​បច្ចុប្បន្ន)៕