គិតមកត្រឹមចុងខែសីហា ឆ្នាំ ២០១៨ នេះ គឺនៅសល់ពេលមិនប៉ុន្មានខែទៀតទេ ដែលទូរស័ព្ទជំនាន់ថ្មីរបស់ក្រុមហ៊ុន Apple នឹងបង្ហាញខ្លួន។
បើតាមសេចក្ដីរាយការណ៍ពីគេហទំព័រ China Times ថ្មីៗនេះឱ្យដឹងថា iPhone X ស៊េរីឆ្នាំ២០១៨ នេះនឹងបំពាក់មុខងារសាកថ្មឥតខ្សែល្បឿនលឿន គឺត្រូវបានធ្វើបច្ចុប្បន្នភាពឱ្យលឿនជាង wireless charging មានលើ iPhone X បច្ចុប្បន្ន។ iPhone គែមស្ដើង ដែលនឹងមានក្បាលឆកជំនាន់ថ្មីនេះ នឹងទទួលបានកំណែលំអបន្ថែមនៅលើមុខងារសាកថ្មឥតខ្សែឱ្យមានល្បឿនលឿនជាងមុន។ យ៉ាងណា ល្បឿននៃ wireless charge នៅតែមិនទាន់អាចប្រៀបធៀបនឹងល្បឿនសាកតាមខ្សែនៅឡើយ។ បច្ចុប្បន្នមានក្រុមហ៊ុនធំៗចំនួន៣ ដែលកំពុងបញ្ចូលមុខងារ wieless charging ទៅលើស្មាតហ្វូនកំពូលរបស់ខ្លួន ក្នុងនោះមាន Apple, LG និង Samsung។
ក្រុមហ៊ុនទូរស័ព្ទផ្សេងទៀត មិនបានយក wireless charging ធ្វើជាចំណុចអាទិភាពនោះឡើយ គឺប្រើត្រឹម fast charging ដូចជា Quick Charge ឬ USB-Power Delivery គឺលឿនគ្រប់គ្រាន់ទៅហើយ។ ប្រហែល Apple នឹងប្រកាសចេញ wireless charging ល្បឿនលឿនជាងមុន ដោយធ្វើបច្ចុប្បន្នភាពទៅលើ AirPower Mat ដែលពេលនេះក្រុមហ៊ុនកំពុងសំងំអភិវឌ្ឍ និងធ្វើតេស្តដើម្បីឱ្យបំពេញមុខងារប្រកបដោយសុវត្ថិភាព និងប្រសិទ្ធភាព៕
