បន្ទាប់បញ្ចេញស្មាតហ្វូន XZ2 Premium អេក្រង់ 4K HDR កាលពីខែមេសា ជាមួយនឹងរូបរាងប្លែកខុសពីម៉ូឌែលមុន ពេលបែកធ្លាយព័ត៌មានថ្មីមួយថា ក្រុមហ៊ុននឹងបញ្ចេញម៉ូឌែលថ្មីមានសមត្ថភាពខ្លាំង ប៉ុន្តែនៅរក្សារាងដដែល ដោយមិនព្រមចូលបក្សឆកដូចគេឯងឡើង។
សម្រាប់ព័ត៌មាននេះបង្ហាញថា ក្រុមហ៊ុននឹងធ្វើការបញ្ចេញ Xperia XZ3 មិនឲ្យផុតឆ្នាំ ២០១៨ នេះទេ។
សម្រាប់ព័ត៌មានលេចធ្លាយដំបូងរបស់ XZ3 នេះគឺកាមេរ៉ា! ជាការពិតណាស់ ស្មាតហ្វូនបច្ចុប្បន្ន កំពុងប្រជែងគ្នាខ្លាំង ទៅលើផ្នែកអេក្រង់ ហើយក្រុមហ៊ុន Sony ក៏ចាប់ផ្ដើមប្រឡូកចូល ក្នុងទីផ្សារកាមេរ៉ាភ្លោះនឹងគេដែរ ហើយនៅលើ XZ2 Premium ថ្មីៗនេះ ថែមទាំងមានសមត្ថភាព ខ្លាំងផងដែរ។
ចំពោះព័ត៌មានលេចធ្លាយរបស់ XZ3 បានបង្ហាញថា វាគឺជាស្មាតហ្វូន លំដាប់កំពូល ដែលខ្ចីផ្នែកមួយចំនួនពី XZ2 និង XZ2 Premium ដោយសារតែរូបរាង ខាងក្រៅរបស់វា ស្រដៀងនឹង XZ2 Premium ប៉ុន្ដែបំពាក់អេក្រង់ ដូចនឹង XZ2 វិញ។ ជាក់ស្ដែងការបង្ហាញ អំពីកាមេរ៉ារបស់ XZ3 គឺដូចទៅនឹង XZ2 Premium ស្ទើរទាំងស្រុងតែម្ដង ដោយវាប្រើប្រាស់ កាមេរ៉ា Motion Eye បំពាក់កាមេរ៉ា ២ គ្រាប់នៅផ្នែកខាងក្រោយ កាមេរ៉ាគោលគឺ ប្រើស៊េនស័រទំហំ ១៩ មេហ្គាភិចស៊ែល Aperture f/1.8 ប្រើលេនប្រវែង ២៥ មីលីម៉ែត្រ តម្លើងកម្រិត ISO ដល់ទៅ 12,800 សម្រាប់ការថតវីឌីអូ និង 51,200 ឯណោះ សម្រាប់ការថតរូបភាព និងមួយគ្រាប់ទៀតទំហំ ១២ មេហ្គាភិចស៊ែល Aperture f/1.6 ដែលសម្រាប់ Aperture ទាំងពីរនេះ និងកម្រិត ISO របស់វា ក្រុមហ៊ុនបានអះអាង រួចមកហើយនៅលើ XZ2 Premium ថា វាថតបានភ្លឺជាងការមើលឃើញ របស់ភ្នែកមនុស្សយើង ទៅទៀត។ លើសពីនេះ កាមេរ៉ាទាំង ២ គ្រាប់ ក៏បានភ្ជាប់នូវមុខងារ ថតព្រាល Bokeh ដែលជាមុខងារ ដ៏ស្វាគមន៍របស់ Xperia និងអាចថតវីឌីអូធំបំផុត ដល់កម្រិត 4K បែបវីឌីអូ HDR ថែមទាំងមានមុខងារ ទប់លំនឹង EIS និង 5-axis OIS បានយ៉ាងប្រសើរ ប្រើប្រាស់ប្រព័ន្ធ ស្រូបសម្លេង ២៤ ប៊ីត ហើយក៏អាចថតវីឌីអូ slo-mo ល្បឿន ៩៦០ ហ្វ្រេមក្នុងកម្រិត Full HD ផងដែរ។
ចំណែកឯផ្នែកអេក្រង់ គឺវាអាចនឹងមានអេក្រង់ទំហំ ៥.៧ អ៊ីញខ្នាត 18:9 Ratio ជាមួយកម្រិតបង្ហាញ Full HD+ (1080 x 2160 ភិចស៊ែល) ហើយក៏មានកម្លាំងម៉ាស៊ីន ស្ថិតនៅលំដាប់កំពូល ផងដែរ ជាមួយការបំពាក់ឈីប Snapdragon 845 ស៊ីភីយូ ៨ គ្រាប់, អង្គក្រាហ្វិច Adreno 630, រ៉េម ៦ ជីកាបៃ, អង្គផ្ទុកទិន្នន័យ ៦៤ ឬ ១២៨ ជីកាបៃ អាចបន្ថែម microSD បានដល់ ៤០០ ជីកាបៃ, មានទំហំថ្ម ៣,២៤០ មីលីអំពែ និងដំណើរការដោយ Android 8.1 ផងដែរ៕
