ចាប់ពីឆ្នាំក្រោយៗទៅ អ្នកប្រើប្រាស់ទូរស័ព្ទទាំងអស់អាចនឹងត្រូវជះលុយខ្លាំងជាងឆ្នាំណាៗទាំងអស់ ខណៈទូរស័ព្ទស៊េរីថ្មីកំពូលៗចេញមកមានតម្លៃសុទ្ធតែក្បែរខ្ទង់ពាន់ ហើយអាចលែងសូវមានហើយកំពូលស្មាតហ្វូនតម្លៃ 500 ទៅ 800 ដុល្លារអីនោះ។
ជាក់ស្តែងកាលពីឆ្នាំកន្លងទៅ ក្រុមហ៊ុន Apple បានដាក់បង្ហាញ iPhone X ដែលមានតម្លៃរហូតដល់ទៅ $999 (ទីផ្សារបរទេស) ក្រោយមកក្រុមហ៊ុន Samsung ក៏ដាក់បង្ហាញ Galaxy Note 9 ដែលមានតម្លៃក្បែរ $929 ដុល្លារផងដែរ ចំណែកប៉ុន្មានខែកន្លងទៅថ្មីៗនេះ Oppo ក៏បានដាក់បង្ហាញស្មាតហ្វូន Find X របស់ខ្លួនជាមួយនឹងតម្លៃលោតដល់ $899 ។
តាមរយៈទីផ្សារស្មាតហ្វូននាពេលបច្ចុប្បន្ន ស្មាតហ្វូន flagship របស់ក្រុមហ៊ុនយក្សនីមួយៗបានហក់ឡើងដល់ជិតខ្ទង់ពាន់ដុល្លារទៅហើយ ដូច្នេះអនាគតទៅស្មាតហ្វូនកំពូលៗនឹងមានតម្លៃដល់ $1,000 ហើយតម្លៃទាំងនេះនឹងក្លាយជារឿងធម្មតាសម្រាប់អ្នកប្រើប្រាស់ ដោយសារតែក្រុមហ៊ុនស្មាតហ្វូនទាំងនោះព្យាយាមបំពាក់កម្លាំងម៉ាស៊ីនខ្លាំងៗលើផលិតផលរបស់ខ្លួន ដែលធ្វើឲ្យតម្លៃកាន់តែកើនឡើងទៅ។ ចំណុចនេះ នឹងជះឥទ្ធិពលដល់អ្នកប្រើប្រាស់ ខណៈត្រូវចំណាយលុយដល់ក្បែ $1,000 ឬលើសនេះបើចង់បានកំពូលស្មាតហ្វូនប្រើនឹងគេ៕
