មេធំរបស់ Huawei ជឿថា Mate 30 Series នៅតែមានដំណើរការលក់ល្អ ទោះគ្មានសេវាកម្មពី Google

បន្ទាប់ពីមានព័ត៌មានកក្រើកស្ដីពីទូរស័ព្ទ Mate 30 Series បង្ហាញខ្លួនដោយគ្មានសេវាកម្មពីក្រុមហ៊ុន Google ពីព្រោះបញ្ហាសង្រ្គាមពាណិជ្ជកម្ម រវាងសហរដ្ឋអាមេរិក និងប្រទេសចិន ដែលអ្នកតាមដានទីផ្សារយល់ថា​វាអាចពិបាក​សម្រាប់ Huawei ក្នុង​ការ​វាយលុយទីផ្សារសកល ប៉ុន្តែនាយកប្រតិបត្តិ Huawei លោក Richard Yu បានបញ្ជាក់ថាស្មាតហ្វូនរបស់ក្រុមហ៊ុនលោកនៅតែអាចលក់បានល្អដដែល។

តាមការចុះផ្សាយរបស់វេបសាយ Android Authority បាននិយាយថា លោក Richard Yu នៅតែជឿជាក់ថា Mate 30 និង Mate 30 Pro នឹងនៅតែលក់បានយ៉ាងតិច 20 លានគ្រឿង។ ខណៈការបំរាមពីអាមេរិក វាបា​ន​ប៉ះ​ពាល់តែទីផ្សារក្រៅស្រុកប៉ុណ្ណោះ។ លោកបន្តថា ការលក់ស្មាតហ្វូនរបស់ Huawei នៅក្នុងប្រទេសចិន នៅតែមានការឡើងរហូតដល់ ៣១% ឯណោះ នេះបើគិតត្រឹមត្រីមាសទី ២ នៃឆ្នាំ ២០១៩ នេះ។ ចុះសម្រាប់អ្នកទាំងអស់គ្នាយល់យ៉ាងណាដែរ។

Huawei ត្រូវបោះបង់ចោលសេវាកម្ម​ទូរ​ស័ព្ទ​ពី Google (Google Mobile Services) ដោយត្រូវ​ជំនួសមកប្រើ​កម្មវិធី និង​សេវាកម្ម​ផ្ទាល់ខ្លួន ហៅថា Huawei Mobile Services វិញ​។ Huawei ក៏បានដាក់ចេញ App Gallery ជាកន្លែងទាញយកកម្មវិធី ដោយបច្ចុប្បន្ន វាមានកម្មវិធីសរុបប្រមាណ ៤៥,០០០ ប៉ុណ្ណោះ។ យ៉ាង​ណា​មិញ អ្នកប្រើប្រាស់នៅតែអាចធ្វើការដំឡើងកម្មវិធី ឬទាញយកឯកសារ APKs មកដំឡើង​បាន​លើ​ស្មាតហ្វូននេះ ដូច​ស្មាតហ្វូនមកចិន ឬកូរ៉េ (ស្មាតហ្វូនសម្រាប់តែប្រើក្នុងស្រុក) ផ្សេង​ដែល​ធ្លាប់​មាន​លក់​នៅ​ទីផ្សារ​កម្ពុជាកន្លង​មក​​បានធម្មតា គ្រាន់តែថា​អាច​រង​ការគំរាមកំហែង​ពី​បញ្ហា​វីរុស​ផ្សេងៗ​គ្រប់ពេល ពី​វេ​ប​សាយ​ឬ Store ក្រៅផ្លូវការ​ទាំងនោះ​៕