ក្រោយមានដំណឹងបែកធ្លាយជាច្រើនកាលពីពេលកន្លងមក ពេលនេះមានដំណឹងថ្មី ដែលត្រូវបានគេបញ្ជាក់ថា វាច្បាស់ និងពិតប្រាកដថា ជាថ្ងៃដែល Google នឹងបង្ហាញស្មាតហ្វូនថ្មីរបស់ខ្លួនមែនហើយ។
តាមការចុះផ្សាយលើគេហទំព័រ Gsmarena ដែលវេបសាយល្បីខាងព័ត៌មានបច្ចេកវិទ្យាទូរស័ព្ទបានឲ្យដឹងថា៖ ក្រុមហ៊ុន Google ត្រៀមនឹងសម្ពោធផ្លូវការ Pixel 3 និង Pixel 3 XL នាថ្ងៃទី៩ តុលាខាងមុខ គឺនៅក្នុងព្រឹត្តិការណ៍មួយដែលប្រារព្ធធ្វើនៅទីក្រុងញូវយ៉ក។
ប្រភពបានបន្តទៀតថា ចំពោះលក្ខណៈសម្បត្តិរំពឹងទុកនៅលើស្មាតហ្វូនថ្មី Pixel 3 XL ថា នឹងបង្ហាញខ្លួនជាមួយអេក្រង់ទំហំ ៦,៧អ៊ីញ កម្រិត QHD+ នៅ (2960×1440)px។ ក្នុងនោះក៏មានចចាមអារ៉ាមខ្លះលើកឡើងថា ស៊េរី Pixel ជំនាន់៣ នឹងត្រូវវែកមុខ អមដោយកាមេរ៉ាក្រោយតែមួយគ្រាប់ single lens ដដែលដូចជំនាន់ Pixel 2 ហើយនឹងបំពាក់ឈីប Qualcomm Snapdragon 845។ ស្មាតហ្វូនរបស់ក្រុមហ៊ុនម្ចាស់សូហ្វ៊ែរ Android OS នេះ នឹងដំណើរការដោយប្រព័ន្ធប្រតិបត្តិការ Android 9.0 Pie។
ក្នុងនោះព័ត៌មានខ្លះទៀតបានចុះផ្សាយថា Pixel 3 XL ថា នឹងបំពាក់ infrared sensor សម្រាប់ស្កេនផ្ទៃមុខ មាន speaker ពីរគ្រាប់ហើយនិងកាមេរ៉ាមុខដែលមានគុណភាពខ្ពស់។ ផ្នែកខាងក្រោយទូរស័ព្ទមានរចនាបថដូចបេះបិទនឹង Google Pixel 2 XL ហើយមានទ្រនាប់ស្កេនក្រយៅដៃនៅខាងក្រោយ ព្រមជាមួយកាមេរ៉ាក្រោយ ១គ្រាប់អមដោយភ្លើងជំនួយ LED flash។ Pixel 3 XL នឹងមានមុខងារ Active Edge ច្របាច់ទូរស័ព្ទដើម្បីជាផ្លូវកាត់ដំណើរការ Google Assistant និងមានកម្លាំងថ្ម 3430mAh ហើយមានអេក្រង់ ៦,៧១អ៊ីញសកម្រិត 1440x2960px៕
