ការងាកមកប្រើបច្ចេកវិទ្យា ដើម្បីសម្រួលដល់ដំណើរការអាជីវកម្មជារឿងមួយដ៏ត្រឹមត្រូវ ខណៈបច្ចេកវិទ្យាបានជួយសម្រួល និងជួយបង្កើនចំណូលបានច្រើន។ ជាមួយគ្នានេះ អ្នកបើកបររ៉ឺម៉កកង់បីជាច្រើនបាន ផ្លាស់ប្ដូរទំលាប់នៃការហៅភ្ញៀវធម្មតា មកប្រើកម្មវិធីហៅ និងកក់ការធ្វើដំណើរតាមរយៈទូរស័ព្ទ បានជួយឲ្យពួកគាត់អាចរកចំណូលបានច្រើនជាងមុនទ្វេដង។
លោក សំណាង ដែលជាអ្នករត់រ៉ឺម៉កម៉ូតូកង់បីដែលប្រើប្រាស់កម្មវិធី PassApp Taxi រាប់រៀបឲ្យដឹងថា មុននឹងឈានជើងចូលមកចាប់អាជីពជាអ្នករត់រ៉ឺម៉ក រូបលោកធ្លាប់ជាអ្នកបើកបររថយន្តឲ្យគេ ប៉ុន្តែដោយប្រាក់ខែមិនអាចចាយវាយគ្រប់ចំណាយ រូបលោកក៏ផ្ដូរមកចាប់អាជីពថ្មីដូចបច្ចុប្បន្ន បើកដឹកភ្លៀវតាមធម្មតាដូចគេឯង។ លោកបន្តថា រយៈកាលបានកន្លង របរថ្មីបានត្រឹមមួយគ្រប់ ដោយមួយថ្ងៃអាចរកចំណូលបានត្រឹម 2 ទៅ 3 ម៉ឺនរៀល បើហេងដឹកចំភ្លៀវស្រួលអាចរកបាន 5 ទៅ 8 ម៉ឺនរៀល ប៉ុន្តែសំណាងមិនចេះតែមានទេ។ ក្រោយមកទៀត នៅចុងឆ្នាំ 2016 លោកក៏ត្រូវបានមិត្តភក្ដិដែលធ្លាប់ស្គាល់គ្នាណែនាំឲ្យប្រើកម្មវិធី PassApp Taxi។
បុរសមាឌមាំ សម្បុរសណ្ដែកបាយនិយាយទាំងទឹកមុខស្រស់ថ្លាថា ក្រោយងាកមកប្រើកម្មវិធីកក់តាមទូរស័ព្ទ សកម្មភាពដឹកភ្ញៀវរបស់លោកមានការប្រែប្រួលគួរឲ្យកត់សម្គាល់ ហើយការជិះដេញចាប់ម៉ូយតាមផ្លូវ តាមផ្សារក៏លែងមានទៀតដែរ។ ត្រឹមឈប់ចតនៅតាមទីសាធារណៈ ឬហាងកាហ្វេណាមួយ ហើយបើកកម្មវិធី PassApp លើទូរស័ព្ទនឹងចាំទទូលការកក់ពីភ្ញៀវជាការស្រេច។ មួយថ្ងៃៗរូបលោកអាចរកចំណូលបានច្រើនទ្វេដង ធៀបនឹងពេលមិនទាន់ចុះឈ្មោះជាសមាជិកនៃកម្មវិធី។
លោកប្រាប់ថា៖«កម្មវិធីនេះស្រួលណាស់បង! យើងអត់ចាំបាច់ហត់ដូចមុនទេ អង្គុយផឹកកាហ្វេមិនទាន់ទាំងអស់ផង មានភ្ញៀវដឹកទៅទៀតហើយ។ និយាយរួមឲ្យតែយើងឧស្សាហ៍ មិនខ្វះភ្ញៀវទេ។ មួយថ្ងៃខ្ញុំអាចរកបានចន្លោះ 7 ម៉ឺន ទៅ 10 ម៉ឺន យ៉ាងធូរ។ »
ទាន់នឹងនឹងរឿងនេះ មានហេតុផលមួយចំនួនដែលធ្វើឲ្យបុរសវ័យកណ្តាលមួយនេះទទួលបានជោគជ័យលើការដឹកអ្នកដំណើរ ក្រោយងាកមកប្រើកម្មវិធី PassApp Taxi ។ កត្ដាសំខាន់គឺតម្លៃ និងភាពងាយស្រួលក្នុងការកក់ហៅរ៉ឺម៉កពេលត្រូវការម្ដងៗ មិនដូចការហៅរ៉ឺម៉កម៉ូតូ ដែលមិនមានប្រើសេវាកម្មវិធី ដែលវាអាចបង្កបញ្ហាឈឺក្បាលដល់អ្នកធ្វើដំណើរ ព្រោះថានៅស្ងាត់ ឬជាយក្រុង កម្រមានរ៉ឺម៉កម៉ូតូកង់បីណាស់ ដែលនេះធ្វើឲ្យអ្នកធ្វើដំណើរពិបាកស្វែងរក។
មួយទៀត ថ្លៃធ្វើដំណើរក៏ជាបញ្ហាប្រឈមផងដែរ ព្រោះរ៉ឺម៉កម៉ូតូកង់ភាគច្រើនមិនមានម៉ែត្រវាស់ដឹងពីចម្ងាយផ្លូវ គឺគ្រាន់តែស្មានៗជាមួយអ្នកដំណើរ ហើយការឲ្យថ្លៃដោយពឹងផ្អែកទៅលើទីកន្លែងជិតឆ្ងាយដែលគិតថាស័ក្តិសមប៉ុណ្ណោះ។ ប្រសិនបើអ្នកដំណើរឲ្យថ្លៃគួរសម អ្នកបើកបរនឹងដឹកទៅដល់ទីតាំង តែមិនដូច្នោះទេអ្នកដំណើរត្រូវស្វែងរករ៉ឺម៉កម៉ូតូបីផ្សេងទៀត ដោយសារចរចាតម្លៃមិនត្រូវគ្នា។ រីឯជនបរទេសវិញ ដែលមិនដឹងពីបរិបទនៅស្រុកខ្មែរ ងាយជាជនរងគ្រោះដោយសាររឿងនេះណាស់៕
