ស្អែកនេះ ក្រុមហ៊ុន Apple នឹងធ្វើឲ្យពិភពស្មាតហ្វូនមានការកក្រើកជាថ្មី តាមការបញ្ចេញនូវឧបករណ៍ថ្មីៗ រួមនឹងទូរស័ព្ទ iPhone ដែលត្រូវបានគេទាយថាមាន ៣ ស៊េរី។ ចំពោះ iPhone ស៊េរីថ្មីទាំង ៣ ម៉ូដែល ដែល Apple នឹងប្រកាសនៅថ្ងៃទី១២ ស្អែកនេះ អាចមានឈ្មោះ iPhone XS, iPhone XS Plus និង iPhone XC។
តាមរយៈព័ត៌មានដែលបានចុះ Apple នឹងសម្ពោធទូរស័ព្ទ iPhone ជំនាន់ថ្មី ឈ្មោះថ្មីបន្ថែម S ពីក្រោយ X គឺ iPhone XS ហើយវានឹងជាទូរស័ព្ទប្រើស៊ីមកាត២ សម្រាប់លក់លើទីផ្សារប្រទេសចិន។ នេះបើតាមព័ត៌មានចុះផ្សាយពីក្រុមហ៊ុនសេវាទូរស័ព្ទចិន China Mobile។ iPhone ថ្មីទាំងបីរួមមាន ម៉ូដែលអេក្រង់ OLED ទំហំ ៥,៨អ៊ីញនឹងត្រូវហៅឈ្មោះ iPhone XS។ រីឯ OLED អេក្រង់ ៦,៥អ៊ីញនឹងចេញលក់ដោយប្រើឈ្មោះ iPhone XS Plus ចំណែកម៉ូដែល LCD អេក្រង់ ៦,១អ៊ីញនឹងមានឈ្មោះ iPhone XC ហើយវាស៊េរីថ្មីទាំងបី ត្រូវរំពឹងថា នឹងមានរចនាបថស្រដៀងទៅនឹង iPhone X ដែលមានគែមស្ដើង ក្បាលឆក notch នៅផ្នែកខាងលើ ហើយក៏នឹងបំពាក់មុខងារ Face ID ផងដែរ។ iPhone ថ្មីនឹងប្រើឈីបជំនាន់ថ្មីដូចគ្នាគឺ Apple A12 ហើយដំណើរការដោយប្រព័ន្ធប្រតិបត្តិការ iOS 12។
ក្នុងនោះទូរស័ព្ទ iPhone XC ថា នឹងបំពាក់កាមេរ៉ាតែមួយគ្រាប់ប៉ុណ្ណោះត្បិតអីវាជា iPhone តម្លៃធូរថ្លៃជាងគេក្នុងចំណោមទាំងបីម៉ូដែល។ ចំណែក iPhone XS នឹង iPhone XS Plus វិញនឹងមានកាមេរ៉ាភ្លោះពីរនៅខាងក្រោយ។ Apple នឹងប្រកាសចេញ iPhone ជំនាន់ថ្មីទាំងពីរក្នុងព្រឹត្តិការណ៍ថ្ងៃទី១២ កញ្ញាឆាប់ៗនេះហើយ៕
