ម្សិលមិញ យើងបានធ្វើការចុះផ្សាយស្ដីពីព័ត៌មានដែលក្រុមហ៊ុន Samsung ចង់បញ្ចេញស្មាតហ្វូនកាមេរ៉ា ៤ គ្រាប់ ប៉ុន្តែថ្ងៃនេះក្រុមហ៊ុនកូរ៉េមួយនេះ បានសម្រេចដាក់ចេញនូវស្មាតហ្វូនបំពាក់កាមេរ៉ាខាងក្រោយចំនួន ៣ គ្រាប់ លើស្មាតហ្វូនជំនាន់ថ្មី មួយម៉ូឌែលហ្នឹងដែរហើយ ដោយមិនបាច់រង់ចាំ ដល់ឆ្នាំក្រោយឡើយ។
Galaxy A7 មានប្រព័ន្ធកាមេរ៉ាក្រោយទំនើបដោយមាន lens ដល់ទៅ ៣ គ្រាប់ សម្រាប់បង្កើនសមត្ថភាពថតរូប និងវីដេអូ។ មួយក្នុងចំណោមនោះបំពាក់ទំហំ 24MP កម្រិត 1.7 aperture ដើរតួជាកាមេរ៉ាគោល ហើយពីរទៀតទំហំ 8MP (ultra wide) កម្រិត f/2.4 និង 5MP (depth) កម្រិត f/2.2 aperture ចំណែកកាមេរ៉ាមុខទំហំ 24MP។
ស្មាតហ្វូន Android ចុងក្រោយរបស់ក្រុមហ៊ុនទូរស័ព្ទកូរ៉េនេះភ្ជាប់អេក្រង់ទំហំ ៦អ៊ីញកម្រិត FHD+ (2220×1080)px ហើយបំពាក់ឈីប octa core ល្បឿន 2.2GHz និង RAM 4GB។ អ្នកក៏អាចជ្រើសរើសម៉ូដែល 64GB និង 128GB ដែរ។ ទន្ទឹមនោះអ្នកក៏នៅមានជម្រើស RAM ធំជាងនេះ ដល់ 6GB អមដោយអង្គចងចាំ 128GB ផងដែរ និងមានរន្ធបន្ថែម microSD ទ្រទ្រង់ដល់ 512GB ថែមទៀត។ ស្មាតហ្វូននេះមានកម្លាំងថ្ម 3300mAh ហើយរត់ដោយប្រព័ន្ធប្រតិបត្តិការ Android 8.0 Oreo៕
