ភ្នំពេញ: មន្ត្រីជាន់ខ្ពស់កម្ពុជា កាលពីថ្ងៃទី ០១ តុលានេះ បានស្នើមន្ត្រីការទូតអង់គ្លេសពិនិត្យលទ្ធភាពផ្តល់អាហាររូបករណ៍ថែមទៀតដល់និស្សិតកម្ពុជា ពិសេសផ្នែកវិទ្យាសាស្ត្រ, បច្ចេកវិទ្យា, វិស្វកម្ម, និងគណិតវិទ្យា (S.T.E.M) ដើម្បីលើកកម្ពស់ការអភិវឌ្ឍធនធានមនុស្ស និងការកសាងសមត្ថភាពរបស់កម្ពុជា សម្រាប់គាំទ្រការធ្វើបដិវត្តន៍ឧស្សាហកម្មទី៤ ក៏ដូចជាការធ្វើដំណើរឆ្ពោះទៅកាន់សេដ្ឋកិច្ចឌីជីថលនាពេលអនាគត។
ការស្នើរនេះ ខណៈលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានជួបពិភាក្សាការងារជាមួយលោក Edward Vaizey ប្រមុខពាណិជ្ជកម្មរបស់ចក្រភពអង់គ្លេស និងលោកស្រី Tina Redshaw ឯកអគ្គរាជទូតថ្មីរបស់ចក្រភពអង់គ្លេសប្រចាំនៅកម្ពុជានៅទីស្តីការក្រសួងពាណិជ្ជកម្ម។
លោករដ្ឋមន្ត្រី ប៉ាន សូរស័ក្តិ បានលើកឡើងអំពីសារៈសំខាន់នៃការកសាងធនធានមនុស្ស ដើម្បីបម្រើការអភិវឌ្ឍសេដ្ឋកិច្ច និងបដិវត្តន៍ឧស្សាហកម្មទី៤ ព្រមទាំងចក្ខុវិស័យរបស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ក្នុងការបន្តកំណែទម្រង់គ្រប់វិស័យ ស្របតាមយុទ្ធសាស្ត្រចតុកោណដំណាក់កាលទី៤ ដែលទើបត្រូវបានអនុម័តកាលពីថ្មីៗនេះ ដើម្បីធានាការអភិវឌ្ឍសង្គមសេដ្ឋកិច្ចប្រកបដោយសមធម៌ និងចីរភាព។
លោកបានជម្រាបជូនបេសកជនទាំងពីរអំពីស្ថិរភាពនយោបាយ វឌ្ឍនភាពនៃកំណើនសេដ្ឋកិច្ច ផលិតផលនាំចេញសំខាន់ៗរបស់កម្ពុជា អត្ថប្រយោជន៍នៃតំបន់សេដ្ឋកិច្ចពិសេស និងកិច្ចប្រឹងប្រែងរបស់ក្រសួងពាណិជ្ជកម្ម ក្នុងការលើកកម្ពស់បរិយាកាសធុរកិច្ច និងកិច្ចសម្រួលពាណិជ្ជកម្មនៅកម្ពុជា។ លើសពីនេះ លោករដ្ឋមន្ត្រីបានអរគុណ សមាគមបាល់ទាត់អង់គ្លេស (FA) ដែលបានប្រើប្រាស់ឯកសណ្ឋានម៉ាក Marks & Spencer ផលិតនៅកម្ពុជា សម្រាប់ក្រុមកីឡាករចូលរួមប្រកួតព្រឹត្តិការណ៍ World Cup ឆ្នាំ 2018 នាពេលកន្លងមក។
ជាការឆ្លើយតប លោក Edward Vaizey និងលោកស្រី Tina Redshaw បានសន្យានឹងខិតខំស្វែងរកអាហារូបករណ៍បន្ថែមសម្រាប់និស្សិតកម្ពុជា ដើម្បីចូលរួមលើកកម្ពស់ការអភិវឌ្ឍធនធានមនុស្ស សំដៅជំរុញការធ្វើបដិវត្តន៍ឧស្សាហកម្មទី៤ និងការបោះជំហានឆ្ពោះទៅកាន់សេដ្ឋកិច្ចឌីជីថលរបស់កម្ពុជា។
ទន្ទឹមគ្នានោះ មន្ត្រីការទូតទាំងពីរ បានកោតសរសើរអំពីវឌ្ឍនភាពនៃហេដ្ឋារចនាសម្ព័ន្ធ និងស្ថិរភាពនៃកំណើនសេដ្ឋកិច្ចរបស់កម្ពុជា ព្រមទាំងកិច្ចសហការល្អរបស់រាជរដ្ឋាភិបាលកម្ពុជា នាពេលកន្លងមក ដែលបានជំរុញឱ្យកម្ពុជា ក្លាយជាគោលដៅវិនិយោគថ្មីនៅក្នុងតំបន់។ បេសកជនទាំងពីរ បានបន្ថែមទៀតថា បច្ចុប្បន្នមានក្រុមហ៊ុនសំណង់អង់គ្លេសជាច្រើន កំពុងស្វែងរកឱកាសចូលមកទីផ្សារកម្ពុជា ដើម្បីនាំយកបច្ចេកវិទ្យាទំនើបៗ និងជំនាញផ្នែកស្ថាបត្យកម្មថ្មីៗ សម្រាប់បម្រើការអភិវឌ្ឍវិស័យសំណង់ ដែលកំពុងមានការលូតលាស់ខ្លាំងនៅក្នុងប្រទេសកម្ពុជា៕
ដោយ: ហៃ សិរី
