ក្រុមហ៊ុន Sony ទើបបានធ្វើការប្រកាសបង្ហាញពីទូរស័ព្ទម៉ូដែលថ្មី Xperia 10 II និងមុខងារប្រើប្រាស់ Xperia Pro នៅក្នុងព្រឹត្តិការណ៍បង្ហាញផលិតថ្មីរបស់ខ្លួន។
ទូរស័ព្ទ Xperia 10 II ឬគេហៅថា Xperia Ten Mark Two អាចនឹងក្លាយជាផលិតផលដែលលក់ដាច់បំផុតសម្រាប់ឆ្នាំនេះ។ ទូរស័ព្ទឆ្លាតវៃម៉ូដែលនេះមានអានុភាពនៃការប្រើប្រាស់ល្បឿនលឿន ដោយមានការប្រើបន្ទះឈីបប្រភេទ Snapdragon 665 មាន RAM ទំហំ 4GB មានអង្គចងចាំក្នុងម៉ាស៊ីន 128GB ខាងក្រោយមានកាមេរ៉ាបីគ្រាប់ទំហំ 12 មេហ្គាភិចសែល កាមេរ៉ាមុខទំហំ 8 មេហ្គាភិចសែល។
ជាមួយគ្នានេះដែរ ទូរស័ព្ទម៉ូដែលនេះមានអេក្រង់ទំហំ 6 អ៊ីង ប្រើកញ្ចក់ប្រភេទ OLED (21:9 CinemaWide និង Full HD+)។ Xperia 10 II មានទម្ងន់ស្រាលជាងទូរស័ព្ទម៉ូដែល Xperia 10 ប្រហែល 10% ហើយនិងមានរាងធំ និងស្រាលជាងមុនផងដែរ។ លើសពីនេះ ថ្មមានថាមពល 3600mAh ច្រើនជាងម៉ូដែលមុន 25%។ មួយវិញទៀត មុខងារ Xperia Adaptive Charging អាចកំណត់ និងផ្លាស់ប្ដូរការប្រើប្រាស់ថ្មឱ្យបានកាន់តែយូរ។
អ្វីដែលពិសេសសម្រាប់ទូរស័ព្ទម៉ូដែល Xperia 10 II នោះ គឺទូរស័ព្ទនេះអាចទប់ស្កាត់ការជ្រាបទឹក និងធូលីបាន ហើយថែមទាំងមានភាពរឹងមាំជាមួយនឹងកញ្ចក់ Gorrila Glass 6 ទាំងមុខ និងក្រោយ។ ទូរស័ព្ទម៉ូដែលនេះនឹងត្រូវចេញលក់ចំនួន ២ ពណ៌ ស និងខ្មៅ នៅអំឡុងរដូវស្លឹកឈើលាស់ឆ្នាំ ២០២០ នេះ ប៉ុន្តែ មិនទាន់ត្រូវបានគេដឹងពីតម្លៃរបស់វានៅឡើយទេ៕
