ក្រោយបញ្ចេញអាវុធថ្មីបំពាក់សុទ្ធកាមេរ៉ាក្រោយ ខ្លះ 3 ខ្លះ 4 លើទូរស័ព្ទត្រកូល A ថ្មីៗនេះ មានព័ត៌មានបែកធ្លាយមួយទៀតថា ក្រុមហ៊ុនយក្សកូរ៉េមួយនេះ អាចនឹងត្រៀមបញ្ចេញទូរស័ព្ទថ្នាក់មធ្យមមួយម៉ូដែលទៀត ស្ថិតនៅត្រកូល A ដដែល តែមានរចនាបថប្លែកគេ និងមានជម្រើសពណ៌ដ៏ទាក់ទាញ ដើម្បីច្បាមយកចំណែកទីផ្សារស្មាតហ្វូនថ្នាក់កណ្ដាលមកវិញ ខណៈទីផ្សារមួយចំនួនធំត្រូវបានគូប្រជែងមកចិនយកគ្មានសល់។
ទូរស័ព្ទ Galaxy A6s ត្រូវបានគេឲ្យដឹងថាវានឹងមានរចនាបថដូចនឹង Galaxy A7 (2018) និង A9 (2018) តែមានបំពាក់កាមេរ៉ាខាងក្រោយត្រឹមតែ 2 គ្រាប់ប៉ុណ្ណោះ ហើយបើផ្នែកខាងមុខវិញ វាសឹងតែមិនមានអ្វី ខុសពី A7 (2018) & A9 (2018) ជាមួយអេក្រង់លាតទ្រវែង សល់គែមលើក្រោម មានទំហំប៉ុនគ្នា ឯគែមសងខាងទៀតសោត ក៏នៅសល់តិចបំផុត។ Galaxy A6s អាចនឹងមានជម្រើសពណ៌ចំនួន 4 ពណ៌ សម្រាប់ជ្រើសរើសដោយពណ៌ទាំងនោះ រួមមាន ពណ៌ខ្មៅ, ពណ៌ខៀវ, ពណ៌ក្រហម និងពណ៌ស្វាយ។
សម្រាប់ដំណឹងពីថ្ងៃប្រកាសជាផ្លូវការ យើងមិនទាន់ច្បាស់នៅឡើយទេ ថាវាអាចមកនៅពេលនោះ។ ប៉ុន្តែបើម៉ូដែលនេះចេញលក់មែន ប្រហែលអាចមានគាំទ្រច្រើន ខណៈតម្លៃត្រូវបានគេនិយាយថា មិនសូវថ្លៃប៉ុន្មានទេ៕
