(ភ្នំពេញ)៖ បន្ទាប់ពីអសកម្មភាពជាច្រើនឆ្នាំ ពេលនេះក្រុមហ៊ុនប្រព័ន្ធទូរស័ព្ទចល័ត qb ត្រូវបានរាជរដ្ឋាភិបាលលុបចោលអាជ្ញាបណ្ណហើយ ដើម្បីស្វែងរកអ្នកវិនិយោគថ្មី ដោយប្រើប្រាស់យន្តការដាក់ដេញថ្លៃ តាមការសម្រេចរបស់រាជរដ្ឋាភិបាល។
ការលុបចោលអាជ្ញាបណ្ណក្រុមហ៊ុននេះ ធ្វើឡើងតាមការសម្រេចរបស់ក្រសួងប្រៃណីយ៍ និងទូរគមនាគមន៍ ដោយមើលឃើញការមិនដំណើរការទៅមុខរបស់ក្រុមហ៊ុននេះ ដែលអតិថិជនចេះតែខើចទៅ។ និយតករទូរគមនាគមន៍កម្ពុជា បានចេញសេចក្តីសម្រេចលុបអាជ្ញាបណ្ណប្រតិបត្តិការ ផ្តល់សេវាទូរសព្ទចល័ត 3G, ដកហូតហ្វ្រេកង់ស៍វិទ្យុ និងការដកហូតលេខទូរគមនាគមន៍ ដែលផ្តល់ជូនក្រុមហ៊ុន CADCOMMS (qb) សម្រាប់ប្រតិបត្តិការ សេវាទូរសព្ទចល័តនៅកម្ពុជា ក្រោយក្រុមហ៊ុនបើកដំណើរការកាលពីឆ្នាំ ២០០៦ ដែលមកដល់ពេលនេះ ដំណើរការបានរយៈពេល១៤ឆ្នាំ។
ជាមួយគ្នានេះនិយតករទូរគមនាគមន៍កម្ពុជា តម្រូវឲ្យក្រុមហ៊ុន CADCOMMS ត្រូវទទួលខុសត្រូវទូទាត់បំណុល ដែលជំពាក់ក្រសួងប្រៃណីយ៍ និងទូរគមនាគមន៍ និយ័តករទូរគមនាគមន៍កម្ពុជា បំណុលរដ្ឋ-ឯកជន កាតព្វកិច្ចពន្ធអាករ និងការលើកទឹកចិត្តផ្សេងទៀត និងត្រូវ មានកាតព្វកិច្ចទទួលខុសត្រូវចំពោះបុគ្គលិក អតិថិជន និងភាគីទីបី ស្របតាមច្បាប់ និងបទប្បញ្ញត្តិជាធរមាន ក្នុងករណីមានការតវ៉ាកើតឡើងជាយថា ហេតុពាក់ព័ន្ធនឹងការលុបអាជ្ញាបណ្ណនេះ៕
