ក្រោយពេលក្រុមហ៊ុន Samsung ធ្វើការបង្ហាញនូវគំរូស្មាតហ្វូនមានអេក្រង់អាចបត់បានកាលសប្ដាហ៍មុន ពេលមានដំណឹងថ្មីបង្ហាញថា ស្មាតហ្វូននេះអាចនឹងមានវត្តមានក្នុងទីផ្សារឆ្នាំក្រោយជាមួយនឹងតម្លៃក្បែ ២K ពេលចេញលក់ដំបូង។
ផ្អែកតាមព័ត៌មានប្រមូលបានកន្លងមកអាចឱ្យគេសន្និដ្ឋានបានថា ទូរស័ព្ទបត់បានរបស់ Samsung នឹងមានឈ្មោះផ្លូវការ Galaxy F ហើយថ្មីៗនេះដែរ គណនីយូធូប Concept Creator ហាក់បោះមួយជំហានមុនដោយបានបង្កើតវីដេអូគំរូដ៏អស្ចារ្យទាក់ទាញចំណាប់អារម្មណ៍សាធារណជនមិនតិចទេ។ យ៉ាងណា ប្រិយមិត្តកុំមានការយល់ច្រឡំ នេះគ្រាន់តែជាគំរូរចនាបថរបស់ Galaxy F ដែលធ្លាប់មានសេចក្ដីរាយការណ៍កន្លងមក វាស្ថិតត្រឹមជាគំរូនៅឡើយ តែវាក៏បានទាញចំណាប់អារម្មណ៍យ៉ាងខ្លាំងដែរ។
Galaxy F នឹងក្រាលដោយទំហំអេក្រង់ ៧,៣អ៊ីញកម្រិតបង្ហាញ 1536x2152px (ដង់ស៊ីតេ 420ppi និងសមាមាត្រ 4.2:3 aspect ratio) ហើយអាចពត់បត់ទៅជាអេក្រង់ពីរ ដែលអេក្រង់មួយនឹងមានទំហំ ៤,៥៨អីញកម្រិត 840x1960px ជាមួយសមាមាត្រ 21:9 និងមានដង់ស៊ីតេ 420ppi៕
