ចិនចាប់អារម្មណ៍យ៉ាងខ្លាំងលើវិស័យទេសចរណ៍នៅខេត្តសៀមរាប

សៀមរាប៖ វិនិយោគ​គិ​ន​ចិន មាន​ចំណាប់អារម្មណ៍​យ៉ាងខ្លាំង​លើ​វិស័យ​ទេសចរណ៍​នៅ​ខេត្តសៀមរាប ខណៈ​ខេត្ត​នេះ​មានសម្បត្តិ​បេតិកភណ្ឌ​ពិភពលោក និង​ជា​ប្រភព​ចំណូល​មិនចេះ​រីងស្ងួត​របស់​ជាតិ និង​ប្រជាជន​កម្ពុជា ព្រមទាំង​ការងារ​វិស័យ​កសិកម្ម​ផងដែរ។

ការ​ថ្លែង​បែបនេះ បន្ទាប់ពី​លោក ឃឹម ប៊ុន​សុង អភិបាលខេត្ត​សៀមរាប នៅ​ថ្ងៃទី១៩ ខែវិច្ឆិកា​នេះ បាន​ជួប​លោក Chen Dehai  អគ្គលេខាធិការ​នៃ​មជ្ឈមណ្ឌល​ចិន អាស៊ាន និង​លោក Liu Zhijie ប្រធានការិយាល័យ​កុងស៊ុល​ចិន​ប្រចាំ​ខេត្តសៀមរាប​នៃ​ស្ថានទូត​ចិន​ប្រចាំ​កម្ពុជា បាន​ពិភាក្សា​ការងារ​មួយចំនួន​នៅ​សាលា​ខេត្តសៀមរាប។

លោក Chen Dehai  អគ្គលេខាធិការ​នៃ​មជ្ឈមណ្ឌល​ចិន អាស៊ាន​លើកឡើងថា លោក​មាន​ចំណាប់អារម្មណ៍​យ៉ាងខ្លាំង​លើ​វិស័យ​ទេសចរណ៍​នៅ​ខេត្តសៀមរាប​ដែលជា​ខេត្ត​មានសម្បត្តិ​បេតិកភណ្ឌ​ពិភពលោក និង​ជា​ប្រភព​ចំណូល ព្រមទាំង​ការងារ​វិស័យ​កសិកម្ម​ផងដែរ។

លោក​បន្តថា វិស័យ​ពាណិជ្ជកម្ម​របស់​ខេត្តសៀមរាប​រឹងមាំ​សាក​សម​លើ​ការអនុវត្ត​គោលនយោបាយ ផ្លូវ​មួយ ខ្សែ​ក្រ​វ៉ាត​មួយ។ ម្យ៉ាង​ទៀង​រវាង​កម្ពុជា ចិន មាន​ប្រវត្តិសាស្ត្រ​ជា​យូរលង់​មកហើយ​នា​សម័យអង្គរ​តាមរយៈ​ការទូត ជី តាខ្វាន់។

លោក​បញ្ជាក់ថា ប្រទេស​ទាំងពីរ ទើប​ប្រារព្ធ​ខួប៦០ឆ្នាំ​នៃ​កិច្ចទំនាក់ទំនង​ការទូត​រវាង​ប្រទេស​ទាំងពីរ និង​បាន​លើក​ការបញ្ជាក់​របស់​រដ្ឋមន្ត្រី​ក្រសួងការបរទេស​កម្ពុ​ជា ដោយបាន​បញ្ជាក់ថា ខេត្តសៀមរាប​ជា​ខេត្ត​វៃឆ្លាត​ទី៣នៅ​កម្ពុជា។

ជាមួយគ្នានេះ លោក ឃឹម ប៊ុន​សុង បានលើកឡើង​អំពី​លទ្ធផល នៃ​កិច្ចសហប្រតិបត្តិការ​ជាមួយ​បណ្តា​ខេត្ត ក្រុង​សម្ព័ន្ធមេត្រីភាព​នៃ​សាធារណរដ្ឋ​ប្រជាមានិត​ចិន និង ខេត្តសៀមរាប លើ​វិស័យ​កសិកម្ម វិស័យ​អប់រំ ក្នុងការ​ផ្តល់​អាហារូបករណ៍ និង​វិស័យ​សុខាភិបាល ដោយបាន​បញ្ជូន​គ្រូពេទ្យ​ស្ម័​ត្រ​ចិត្ត​មក​ព្យាបាល​ជំងឺ ជូន​ប្រជាជន​ដោយ​ឥតគិតថ្លៃ សំខាន់​ការព្យាបាល​ជំងឺភ្នែកឡើងបាយ ព្រមទាំង​បាន​ផ្លាស់ប្តូរ​នូវ​ដំណើរ​ទស្សនកិច្ច សិក្សា​ពីគ្នា​ទៅវិញទៅមក​ផងដែរ៕

អត្ថបទ៖ ហៃ សិរី