ក្រុមហ៊ុន Apple បានបង្ហាញចេញប្រព័ន្ធប្រតិបត្តិការជំនាន់ចុងក្រោយរបស់ខ្លួន iOS 12 ជាផ្លូវការមែន នៅក្នុងសន្និសីទអ្នកអភិវឌ្ឍកម្មវិធី WWDC ឆ្នាំនេះ។
iOS 12 នឹងធ្វើឱ្យដំណើរការទូរស័ព្ទដំណើរការរលូនល្អ កែលំអ FaceTime ដែលអាចប្រើដល់ 32 នាក់ក្នុងពេលមួយ អាចបង្កើតរូប Animoji សម្រាប់ខ្លួនអ្នកផ្ទាល់ដោយមាន Animoji ថ្មីចំនួន 4 សម្រាប់ប្រើ និងការដាក់ចេញ ARKit2 សម្រាប់ប្រើប្រាស់ជាមួយមុខងារ augmented reality។
ប្រព័ន្ធថ្មី iOS 12 នេះ ត្រូវបានកែខៃជួយបង្កើនសមត្ថភាពដំណើរការលើមុខងារកម្មវិធីមួយចំនួនលើ iPhone បានលឿនជាងមុន និងបទពិសោធន៍លើ responsive ល្អជាងមុនផងដែរ។ ជាក់ស្ដែង នៅពេលអ្នកកំពុងបើកកម្មវិធី Camera និងវាយអក្សរជាមួយ keyboard ជាដើម វានឹងមានល្បឿនលឿនជាងមុន។ ក្រៅពីនេះក៏មានចំណុចកែលំអគួរកត់សម្គាល់ជាច្រើនទៀត ដែលអ្នកនឹងទទួលបានលើ iPhone ជាមួយសូហ្វ៊ែរថ្មីនេះ។
ក្រុមហ៊ុន Apple ក៏បានបង្កើតផ្លូវកាត់ Shortcut កម្មវិធីថ្មី ដែលអាចឱ្យអ្នកធ្វើការបញ្ចូលគ្នានូវកិច្ចការ tasks ជាមួយការស្នើលើមុខងារ Siri ពោលគឺរឹតតែវៃឆ្លាត ជាជំនួយការល្អមួយសម្រាប់ទម្លាប់ប្រចាំថ្ងៃរបស់អ្នក។ Siri នឹងរៀនពីទម្លាប់ប្រចាំថ្ងៃរបស់អ្នក ហើយណែនាំនៅពេលអ្នកចង់ចូលទៅផ្នែកណាមួយពី Lock Screen។ អ្នកក៏អាចប្រើ shortcut ជាមួយសំឡេងបញ្ជារបស់អ្នក ឬបង្កើតសំឡេងផ្ទាល់របស់អ្នក ជាមួយ Shortcut app ថ្មី៕
