រយៈពេល ៣ ខែបន្ទាប់ពីត្រូវប្រទេសអូស្ត្រាលីហាមឃាត់ពីការអភិវឌ្ឍបណ្តាញ 5G នៅក្នុងប្រទេសខ្លួន ក្រុមហ៊ុន Huawei បានខកចិត្តថ្មី នៅប្រទេសនូវែលសេឡង់ ក្រោមហេតុផលសន្តិសុខសុវត្ថិភាពបណ្ដាញ។
ទីភ្នាក់ងារស៊ើបការណ៍សម្ងាត់របស់ប្រទេសក្នុងតំបន់ប៉ាស៊ីហ្វិកបានបដិសេធចំពោះការប្រើប្រាស់ឧបករណ៍អេឡិចត្រូនិកដំណើរការប្រព័ន្ធ 5G របស់ Huawei ដោយលើកឡើងពីការព្រួយបារម្ភអំពីបញ្ហាអសន្តិសុខជាតិ។ ការបដិសេធនេះ ធ្វើឡើងបន្ទាប់ពីជាក្រុមហ៊ុន Spark ដែលជាក្រុមហ៊ុនបណ្ដាញដ៏សំខាន់មួយនៅក្នុងប្រទេសនូវែលសេឡង់ បានដាក់ពាក្យស្នរសុំតភ្ជាប់បច្ចេកវិទ្យាជំនាន់ក្រោយមួយនេះ។
លោក Andrew Hampton នាយកការិយាល័យសន្តិសុខផ្នែកទំនាក់ទំនងរបស់រដ្ឋាភិបាលនូវែលសេឡង់បាននិយាយថា ហានិភ័យសុវត្ថិភាពបណ្តាញជារឿងសំខាន់មួយត្រូវបានកំណត់។ ក្រុមហ៊ុន Huawei បានចូលខ្លួមកអភិវឌ្ឍន៍បណ្ដាញទំនាក់ទំនងនៅប្រទេសនូវែលសេឡង់នេះ ចាប់តាំងពីការដាក់ឲ្យប្រើប្រាស់នូវប្រព័ន្ធ 4G ដោយវិនិយោគអស់ចំនួន 400 លានដុល្លារ ឬច្រើនជាង 270 លានដុល្លារអាមេរិក៕
