ពិតជាកប់ណាស់ ពេលនេះក្រុមហ៊ុនផលិតរថយន្តកម្រិតលំដាប់ ដែលពិភពលោកទទួលស្គាស់ Rolls-Royce បានប្រកាសចេញនូវរថយន្តកម្រិតលំដាប់អភិជនម៉ូឌែលថ្មីឆ្នាំ 2019 ប្រភេទ Super-SUV ចូលមកទីផ្សារកម្ពុជា យើងហើយកាលពីយប់ថ្ងៃទី 30 ខែធ្នូ ឆ្នាំ 2018 ម្សិលមិញ។
រថយន្តនេះមានឈ្មោះហៅជាផ្លូវការថា Cullinan ជាប្រភេទ SUV ដែលមានទំហំធំ មាឌយក្ស មានទ្វា 5 សងខាង 2 និងក្រោយ 1។ រថយន្តនេះអាចយកទៅបើកបរបានគ្រប់ស្ថានភាពផ្លូវ ពិសេសស៊ីជាមួយនឹងប្រភេទផ្លូវ Off-road ឬផ្លូវដី ដោយមានប៉ុង 2 ជាប្រភេទ all-wheel drive ធន់ជាមួយនឹងផ្លូវពិបាកៗ ព្រោះវាមានប្រព័ន្ធប៉ូមអេឡិចត្រូនិច ដែលសម្របទៅតាមស្ថានភាពផ្លូវ និង Mode ដែលម្ចាស់របស់វាកំណត់ ដូចជាផ្លូវបើក ទួល ដីស្អិត ផុក ព្រិល ដីខ្សាច់ ស្មៅមានសំណើម ថ្ម ជាដើម ជាមួយនឹងប្រព័ន្ធការពារ កាមេរ៉ាជុំវិញ យ៉ាងមានសុវត្ថិភាព។
រថយន្ត Rolls-Royce Cullinan ប្រើប្រាស់នូវម៉ាស៊ីន V12 លើស៊ីឡាំងកម្រិត 6.75-liter Twin-Turbo ផ្ដល់នូវសន្ទុះ និងល្បឿនលឿនមិនធម្មតា ជាមួយកម្លាំង 563 កម្លាំងសេះ ដោយកង់របស់វាអាចរត់បានចំនួន 5000 ជុំក្នុងមួយនាទី។
មិនតែប៉ុណ្ណោះ បើក្រឡេកទៅមើលផ្នែកខាងក្នុងវិញឃើញថា នេះមិនមែនជារថយន្តលំដាប់ SUV ទូទៅឡើយ វាប្រណិតកប់តែម្ដង មានពូកស្បែក លាយឡំជាមួយលោហៈកម្រិតខ្ពស់ ប្រព័ន្ធគ្រប់គ្រងទំនើប ប្រើប្រាស់កៅអីចុច ទ្វាចុច កញ្ចក់ចុច ពិសេសមានទីតាំងធំលូលាយ អាចជិះបាន 5 នាក់ អាចទទួលទានភេសជ្ជៈកម្រិត High បានទៀតផង អមជាមួយនឹងគូទក្រោយតកៅអីចេញសម្រាប់បរិយាកាស Romantic។ ចំពោះតម្លៃនៃរថយន្ត Rolls-Royce Cullinan ត្រូវគេបង្ហើបឲ្យដឹងថាវាមានតម្លៃប្រមាណ 1 លានដុល្លារសហរដ្ឋអាមេរិកសម្រាប់ទីផ្សារកម្ពុជាយើង៕
